69-годишен дедо секој ден патува час и половина само за да заврши средно училиште

Дурга Ками од Непал има 69 години и секој ден оди по час и половина за да дојде на училиште. Со оглед на годините, многумина би претпоставиле дека е учител.

Но, Ками секој ден седи на школските клупи заедно со останатите помлади ученици за да ја заврши последната година средно училиште во Непал.

Секое утро, после појадокот ја облекува училишната униформа, ги подготвува книгите и тргнува на пат кој трае час и половина за да стигне на првиот час кој почнува во 10 часот наутро.

Останатите ученици можат слободно да му бидат внуци.

„На почетокот се чудев зошто стар човек би доаѓал да учи со нас. Но, како поминуваше времето, така почнавме да уживаме во неговото друштво. Некои предмети му одат послабо отколку на другите ученици, но му помагаме“ - вели еден 14-годишен соученик на Ками.

Ками е најстариот ученик во училиштето, а можеби и во светот. Неговите соученици го нарекуваат „Bajee“ - што значи дедо.

Вели дека неговата идеја е да ги поттикне и останатите постари личности кои никогаш немале можност да завршат средно училиште, да се запишат и да завршат.

Н. Г. | Црнобело