Ликовите и приказните се инспирирани од реалноста: Како серијата „Маша и Медо“ го освои светот?

„Идејата за серијата произлезе од тоа што сакавме да го прикажеме односот помеѓу децата и возрасните, и тоа во комична форма, за сите гледачи да може да ги разберат чувствата што ги доживуваат ликовите“, вели режисерот на Маша и Медо.

Речиси не постои дете кое не ги знае Маша и Медо – популарните ликови кои во секоја нова епизода имаат интересна и, на детски начин, забавна незгода.

Иако две руски студија за анимација им понудиле на креаторите на Маша и Медо да ги преземат сите технички аспекти од целата серија, сепак, шест месеци по лансирањето на серијата, креаторите сфатиле дека тоа не е најдобрата опција.

Затоа, решиле да основаат сопствено студио, а бидејќи со економската криза од 2008 година се затвориле многу аниматорски студија, авторите на Маша и Медо можеле да регрутираат високо професионален тим.

„Идејата за серијата произлезе од тоа што сакавме да го прикажеме односот помеѓу децата и возрасните и тоа во комична форма, за сите гледачи да може да ги разберат чувствата што ги доживуваат ликовите“, вели режисерот на проектот, Денис Червјацов.

Ликот на Маша е инспирација од вистинско девојче

Според изјавите на режисерот, ликот на Маша е инспирација од вистинска личност. Во 1990-тите години, уметничкиот директор на проектот, Олег Кузовкин, бил на одмор кога на плажата здогледал мало девојче.

Девојчето било многу опуштено, што можело да му се приближи и на непознат човек и да игра шах со него или да му ја земе опремата и да оди на пливање… Меѓутоа, по неколку дена, туристите почнале да се кријат од девојчето, бидејќи било многу наметливо.

За создавање на епизодите, креаторите користат приказни од нивниот личен живот.

„Повеќето од нас имаат деца, дури и аниматорите го копираат однесувањето на нивните или децата на нивните пријатели, како што прават сценаристите“, вели Червјацов.

Меѓународниот успех на Маша и Медо

„Мислам дека во која било земја, децата под пет години не се многу различни“, вели режисерот.

Тој додава и дека за успехот на Маша и Медо придонесува и тоа што во епизодите нема долги дијалози, туку акцентот е ставен на акцијата, а анимираниот филм е поблиску до форматот на нем филм, каде што сè е јасно без зборови.

Марија Терешченко, програмски директор на фестивалот на Големиот цртан филм во Москва, успехот на анимацијата го препишува на фактот што нејзините креатори, покрај квалитетот на сликата, ги рефлектираат и најновите трендови во грижата за децата и воспитувањето.

„Претходно, класичниот анимиран филм беше поврзан со насилство, прикажано преку хумор. Но, сега тоа се смета за штетно за психолошкиот развој на децата.

Маша и Медо не покажуваат насилство, а децата денес имаат повеќе слобода и помалку ограничувања за разлика од минатото.

Малата незапирлива Маша се појави во време кога денешните деца може да се препознаат во неа“ – вели таа.

Светот на Маша и Медо се прошири на уште два секундарни производи

Во 2012 беше лансирана „Приказните на Маша“ (Masha’s Tales) каде што Маша ги воведува гледачите во светот на руските народни приказни.

Во 2014 година се појави вториот секундарен производ, „Страшните приказни на Маша“ (Masha’s Spooky Stories), каде што таа раскажува „страшни“ приказни, кои се покажуваат како смешни и поучни.

Маша и Медо заработуваат околу 1,5 милиони долари месечно од рекламирање на Јутјуб. Друг голем дел од приходите на проектот доаѓаат од лиценцирана трговија, како што се прехранбени производи, канцелариски материјал, играчки и други производи.

М. Ѓ | Црнобело