„Дами, престанете да доаѓате на забар со кармин на вашите усни“ – што ги нервира луѓето според нивната професија?!

Низ светот постојат навистина голем број на професии и секоја од нив се одликува со различни специфичности.

Без разлика на тоа колку си ја сакаме нашата работа, мора да признаеме дека постојат моменти кога чувствуваме дека нашата толеранција полека нѐ издава. 

И тоа е сосема нормално, со оглед на тоа дека работата со луѓе не е воопшто лесна - бидејќи секој од нас е различен.

Колку е „тешко“ човек да се справи со секого зависи пред сѐ од професионалноста којашто сме ја стекнале со самото работно искуство, па понекогаш и од она „на која нога сме се разбудиле“ тоа утро.

Сте размислиле ли некогаш што најмногу го нервира продавачот во локалната продавница, или пак таксистот со повеќе од 20 годишно искуство?!

Во продолжение издвојуваме изјави од форуми како Редит, од луѓе со најразлични професии, односно кои се оние „мали“ нешта кои умеат да ги извадат од кожа:

Работник во супермаркет

„Навистина ме фрустрира моментот кога во рафтовите за бели печива ќе пронајдам јогурт или друг пијалак којшто всушност е земен од фрижидерите и е оставен таму.“

Спасител на вода

„Веќе 5 години работам како спасител на вода и мразам кога луѓето мислат дека е смешно да глумиш дека се давиш. Не тоа воопшто не е интересно.“

Стоматолог

„Дами, ве молиме престанете да доаѓате на забар со кармин на вашите усни. Тој се нанесува на нашите ракавици и ги прави лизгави.“

Работник во Луна парк

„Не разбирам зошто гостите се лутат што не можам да им кажам кога повторно ќе проработи лулашката. Не сум јас оној што ја поправа, ниту пак можам да предвидам кога ќе престанат грмотевиците.“

Банкар

„Зошто по ѓаволите не се почитува редоследот според бројчето коешто соодвестува. Не, нема да ве услужиме преку ред!“

Вработен во стационар за животни

„Ако не сте подготвени да го посвоите миленичето тој ден, слободно разгледајте наоколу, но немојте да ги терате вработените со часови да трчаат околу вас, за на крајот да им кажете: „Видете, не можам да го посвојам во моментов бидејќи...“ Навистина, не е во ред.“

Библиотекар

„Многумина од луѓето навистина не разбираат дека книгата треба да се врати на договорениот, впишан датум. И дефинитивно не можат да се помират дека во спротивно им следува казна.

Да, библиотеката ви овозможува пристап до секоја книга којашто ќе ја посакате. Сè што треба да направите е да платите членарина и да ја вратите книгата навреме.“

Келнер

„Доколку вашиот келнер дели пијалаци од послужавник, ве молиме, не обидувајте се да земете некоја од чашите. Знаеме дека сакате да ни помогнете, но всушност тие се оние што го балансираат послужавникот, а најмала невнимателност може да предизвика целиот послужавник да заврши на земја.“

Наставник

„Јас сум наставник во четврто одделение и мразам кога родителите го одобруваат лошото однесување на своето дете. Нешто во стилот на: „Супер е тоа што Тими без причина го фрли столчето на неговиот соученик?““

Продавач на карти во кино

„Јасно ни е дека киното е совршено за љубовен состанок. Но, ве молиме претходно договорете се кој ќе ги плати картите, или барем обидете се тоа да биде брзо бидејќи остануваат уште 5 минути до почетокот на филмот, а позади вас чекаат редица од луѓе.“

Обезбедување во здравствена установа

„Имајте предвид дека ние не сме виновни доколку сте го погрешиле терминот за дозволени посети. Сепак, станува збор за болница каде што постои некаков ред.“

Градежен работник

„Навистина фрустрира кога луѓето нѐ гледаат како работиме, но остануваат на истата страна од тротоарот каде што сме и ние. Едноставно, префрлете се на другата страна, буквално ќе ви одземе 5 секунди од вашето време.“

Вработен во казино

„Секојдневно посетителите нè прашуваат која машина ќе го погоди џекпотот. Доколку го знаевме одговорот, веројатно немаше да бидеме тука, зарем не?“

Мила М. | Црнобело