Што се случува кога ќе ги додадете тетките за пријатели на Фејсбук?

Од сите откачени ситуации во животот, ситуацијата кога тетките и стрините ви се виртуелни Фејсбук пријателки, е состојба која се граничи со блага шизофренија. Во последно време и бабите земаат силен замав. 

Сега, откако конечно сфатија дека глувчето не е вистинско глувче, и тие решија да се приклучат кон големото фејсбуковско семејство и да удрат здрава доза „сеир“.

Мајките и татковците божем коментираат малку порезервирано, но со огромна доза на љубов, а искрено – ниту тие не ги штедат комплиментите.

Како изгледа тоа?

- „Најубава на мајка, лична како сонце“ – коментар на фотографијата од вчерашната журка, на која гледавте два, наместо еден телефон додека ве сликаа. Мама, секако.

- „Јунак на татко, крвта не е вода“ – тато овојпат, со гордост и огромна доза на нескриен патриотизам, што создал херој. На фотографијата синчето со 10 шишиња пиво пред него.

- „Шо сте убај, поздрав од студенио Детроит“, потпис Живка (а коментирала извесна Петранка Муратова, пример). Која е Живка? Живка веројатно нема Фејсбук, ама ја малтерира Петранка, нејзина ќерка или снаа, а оваа кутрава мора да напише поздрав или отиде ручекот.

- „Епа стварно од наша фамилија нема лош човек“ – тетка овојпат. Лош во превод значи грд.

- „Плукната на мајка ти, и она си беше така покрупна во младоста“ – стрина ти, прва комшика, будно го следи варирањето на вашите килограми.

- „Сине, зошто вака намуртена слика? Смени си ја сликата, ич не си убав“ – мама, загрижено.

- „Море доста по кафани шетате, деца треба да думкате еј!“ – по малку налутената сестра на вашата мајка, коментар сличен со „Само слики со кучиња ставаш, слика со дечко кога ќе видиме?“. Тоа секако е за ваше добро, тета се грижи да не престари додека заигра на свадба, а ти да не останеш престарена мома.

- „Леле, сонце и кај вас пука ко кај нас во Аустралија“ – тетката, која 20 години не стапнала во Македонија, ама го има целото семејство на Фејсбук, со кое е во редовен контакт. И да, изненадувачки – нè грее истото сонце.

- „Машала, роден си за во банка да работиш“ – тетинот, на фотографијата додека ги покажуваш парите што си ги фатил на спортска.

- „Домаќинка на мама, сè знае да направи, умница“ – мама, ентузијастично и со охрабрување на вашиот малку подзагорен ручек.

- „Најубави, без конкуренција“ – сите родители, на сите свои деца и нивните партнери.

Но, добро. Не е за замерка, затоа што се искрени, и сепак на крајот од денот, се работи само за посветеност и внимание. Тие нè обожаваат и сакаат да ја покажат сета своја љубов на виделина, пред целиот свет.

Секако многу помили ни се овие коментари, од оние „ласкавите“ кои вклучуваат комплименти како: мачкица, sexyyyyyy, зрачиш!, сонценценце... нели?

(О)Милена | Црнобело