Мајко Македонијо, зошто ова ти го правиме?

Mајко Македонијо...

Зошто само лошо за тебе зборуваме, како грам љубов во срцето за тебе да немаме?

Зошто фрламе отпадоци кај ќе стигнеме, како наша да не си?

Зошто не внимаваме на твоите убавини, а кога одиме во туѓа земја највнимателни сме?

Зошто со некултура те ставаме во истата реченица, а ние сме „твојата некултура“?

Зошто само те критикуваме, а не преземаме ништо да те промениме?

Зошто во тебе не ни се работи, а во туѓина и по две работни функции опслужуваме?

Зошто природата не ти ја цениме, а настрана кога ќе отидеме и понеубави места ги фалиме на сиот глас?

Зошто многу ти ветуваме, а малку ти исполнуваме, работите да се случат сами од себе очекуваме?

Зошто забораваме дека ти си јас, Петко, Бојан, Марија, Игор, дека ние сме Македонија?

Зошто пресудуваме дека патот со трње ни е поплочен само затоа што тука сме се родиле, а тука мајка и татко се вљубиле, тука нè родиле, тука одгледале?

Зошто мајко Македонијо како маќеа која ни била доделена те гледаме и која не сме се ни потрудиле да ја сакаме?

Имаш ти мани, знам јас, и сите пак гласно за нив ќе зборуваат.

Но, имаш ти и убавини, исто така знам и ги живеам.

Имаш ти жуборливи водопади, недогледни полјани, имаш семејни вредности, искрени дружби, највесели кафеани...

Имаш луѓе искрени, нудиш живот опуштен, темпо што да посветиш време и на фамилијата ти дава.

Имаш многу, само малку кој за твоето многу зборува.

Најчесто тоа ќе го сфатиме кога далеку ќе отидеме, кога предоцна ќе биде или кога животот залудно ќе го минеме во твое критикување, наместо славење.

Содржината и ставовите изразени во авторските текстови и колумни претставуваат лични ставови на авторот и не мора нужно да ги одразуваат ставовите на редакцијата на порталот CRNOBELO.com

©CRNOBELO.com Забрането преземање и копирање. Крадењето на авторски текстови е казниво со закон.

С. С. | Црнобело / фото: depositphotos.com