„Конечно ја запознав Ријана“ – Малала Јусуфзаи, која на 15 години беше застрелана во глава, возбудена од присуството на Оскарите (фото)
- Детали
- среда, 15 март 2023
„Посакувам некој да ми кажеше дека одењето на Оскарите не е настан што трае само еден ден“ – го започнува својот дневник Малала Јусуфзаи. Девојката што на 15 години беше застрелана од Талибанците затоа што одеше во училиште, денес е млада дама, која со сопругот се појави на Оскари 2023 и раскажува возбудливо за своето искуство.
Во 2012-та година целиот свет дозна за Малала Јусуфзаи, девојчето што беше застрелано од Талибанец во главата затоа што сакаше да оди во училиште, а оттогаш до денес таа порасна во млада жена (25), која зад себе им голем број успеси.
Малала е позната активистка, добитничка на Нобеловата награда, а сега има уште една титула во својата импресивна биографија.
Таа за првпат работеше како извршен продуцент на снимањето на филмот Stranger at the Gate, а истиот беше номиниран за најдобар краток документарен филм на Оскари 2023.
Благодарение на него Малала имаше можност да го оствари својот сон и да присуствува на доделувањето на престижните награди.
Придружувана од нејзиниот сопруг Асер Малик, со кого стапи во брак во 2021-ва година, Малала имаше прилика да се појави на црвениот тепих во тоалета од Ralph Lauren, а за целото искуство таа направи дневник во кој ги запишувала своите емоции за тоа како се чувствувала дента на настанот.
Дневникот во целост е објавен во магазинот Vogue, а во продолжение ви пренесуваме некои од најинтересните делови:
„Посакувам некој да ми кажеше дека одењето на Оскарите не е настан што трае само еден ден. Има голем број забави пред и по церемонијата, прикажувања и работни состаноци, интервјуа за медиуми и проби на облеката.
Навистина е исцрпувачки, но и возбудливо. На крајот на овие неколку турбулентни недели, утрото на Оскарите ми започна со брза каша, овошје и чај за појадок. Би сакала да јадев палачинки, но немав време“ – пишува таа.
По ова, младата активистка се осврнува на периодот поминат со стилистите кои работеле на нејзината тоалета, накитот, но и на шминката што таа ја носеше за да блесне на црвениот тепих.
„Сѐ уште се навикнувам на шминката наменета за црвен тепих. Многу е поделикатна од мојата секојдневна рутина“ – вели таа и додава дека конечно успеала да стигне на настанот во 5 часот попладне.
За време на патувањето таа вежбала како би одговарала на прашањата поврзани со нејзиниот филм, облеката и накитот.
Како што вели, поминала неколку часа со новинарите и другите гости и на крај била пресреќна кога седнала на столчето и чекала да започне настанот, а вели дека била највозбудена во мигот кога успеала да ѝ се приближи и да се запознае со Ријана.
„Таа имаше прекрасна изведба и бев пресреќна што ја видов во живо“ – пишува Малала.
За крај, младата активистка вели дека нејзините први Оскари биле напорни, но времето брзо поминало, а за крај додава дека следниот ден го започнала со палачинките што ги посакувала претходниот ден.
Б. С. Б. | Црнобело
Би можело да ве интересира:
Препорачуваме
Најчитани неделава
