Авганистанка се породи во авион, закана со оружје на вести: Со што се соочуваат жителите на Авганистан поради Талибанците?

Детали

вторник, 31 август 2021

Музички ѕвезди и новинарки бегаат од државата стравувајќи за своите животи, жени се породуваат во авиони, Авганистанци добиваат заканувачки писма…

Откако Талибанците го освоија Кабул, новинарите од светските медиуми се обидуваат да ни пренесат со што сè се соочуваат тамошните жители кои веќе стравуваат и за своите животи. Секојдневно гледаме фотографии и читаме за настаните во Авганистан кои нам ни изгледаат дури нереално.

Талибанците тврдат дека се промениле и дека Авганистанците нема потреба да бидат исплашени, но видеото што го сподели новинарката на BBC Јалда Хаким ја разбранува јавноста. Видеото е инсерт од вести на авганистанска телевизија – репортерот ја води програмата додека е опкружен со неколку вооружени Талибанци.

„Вака изгледаат политичките дебати на авганистанската телевизија. Талибански војници го надгледуваат водителот“, пишува Јалда, истакнувајќи дека репортерот вели дека Авганистанците не требало да се плашат од Талибанците.

Видеото беше споделено од многу новинари и наводно Талибанците упаднале во студиото и барале репортерот да зборува со нив и да ја пренесе нивната порака.

Поради ситуацијата, многу Авганистанци тргнаа да ја напуштат држава и дел од нив успеаја да се качат на авион. Една од нив, Соман Нури, била бремена кога се качила на авионот во Кабул. Од Кабул, Соман слетала во Дубаи, а оттаму требало да оди за Бирмингем. Но додека била во авионот, почнала да се породува.

Бидејќи во авионот немало медицинско лице, стјуардесите помогнале во породувањето и, за среќа, сè поминало во најдобар ред. Но можеме само да мислиме колкав страв чувствувала 26-годишната мајка во миговите пред да го напушти Кабул.

Уште потажно е што Соман не е единствената жена која се породила додека се обидувала да избега од својата родна држава. Претходно, жена, чиј идентитет е непознат, се породила во воен авион на САД веднаш пред да слета во Германија.

Жените од Авганистан се изложени на можеби најголем ризик бидејќи постои опасност да им бидат одземени најосновните права. Бидејќи според правилата на Талибанците жените треба да се покриени, голем дел од Авганистанките од забавната индустрија почнаа да се плашат за своите животи.

Аријана Сајед е најпознатата поп-пејачка во Авганистан која успеа да побегне од нејзината родна земја во еден од авионите на САД.

36-годишната пејачка има изјавено дека уште пред да се влоши ситуацијата, авганистанските свештеници се противеле на нејзините концерти, па била сигурна дека нештата ќе бидат многу, многу полоши.

Во Авганистан на мета се и многу новинари, особено жени, а во овој случај можеби најмногу се истакнува Бехешта Арганд. Бехешта е жена новинар кој успеа да направи интервју со портпарол на Талибанците, пред да избега од државата.

Иако во Авганистан има други жени новинари како Бехешта, сега се поставува прашањето дали Талибанците ќе им дозволат да продолжат со нивната работа. Плашејќи се за својата безбедност, Бехешта решила дека е најдобро да ја напушти државата и да не ризикува.

Новинарката има само 24 години, а нејзиното интервју беше прво во историјата на Авганистан каде што портпарол на Талибанците е интервјуиран во студио од страна на жена.

Подоцна новинарката изјави дека го направила интервјуто за жените од Авганистан.

„Ако останеме дома и не одиме во канцелариите, ќе ни речат дека жените не сакаат да работат. Па си реков ’Почни да работиш‘. И, му реков на Талибанецот ’Ги сакаме нашите права. Сакаме да работиме. Сакаме – мораме – да бидеме во општеството. Тоа е наше право‘“, откри Бехешта за CNN.

Наводно, некои луѓе во Авганистан добивале и писма од Талибанците во кои се обвинети дека „соработувале со Западот“. Луѓето кои ги добиле писмата биле поканети на суд, а доколку не се појават, велат дека ги очекува смртна казна. Тие се плашат дека дури и да се појават на суд, повторно ќе бидат убиени, па бараат начин да ја напуштат државата.

Ова се само дел од страдањата на луѓето во Авганистан што ја разбрануваа јавноста. Додека некои Авганистанци успеаја да ја напуштат државата, многумина останаа и се справуваат со неизвесноста додека Талибанците да покажат дали навистина се промениле.

Прочитајте и Новинарката што го воодушеви светот - единствената жена на прес-конференцијата на Талибанците

Спирова С. | Црнобело