Кралицата Елизабета сече торта со церемонијален меч + анегдоти кои ја покажуваат нејзината смисла за хумор

Детали

понеделник, 14 јуни 2021

Оние кои ја познаваат кралицата Елизабета лично, велат дека таа има одлична смисла за хумор, а деновиве таа го докажа тоа, кога пресече торта со огромен церемонијален меч. Но, ова не е првпат кралицата да ја покаже нејзината забавна страна.

Елизабета, заедно со Кејт Мидлтон и Камила, присуствуваше на настан каде што ги сретна волонтерите кои ќе ја организираат свеченоста за 70-тата годишнина од нејзиното владеење.

За време на настанот кралицата требаше да исече торта, а реши да го направи тоа со огромен церемонијален меч. Според People, присутните ѝ кажале дека има обичен нож со којшто може да ја исече тортата, на што кралицата одговорила:

„Знам дека има. Но ова е многу понеобично“.

Кралицата ја покажа нејзината забавна страна и на самитот Г-7, додека позираше за фотографија со светските лидери, а Guardian објави и видео од моментот.

На видеото, најпрво се гледа како лидерите и кралицата се местат за фотографијата, а во еден миг Елизабета вели:

„Треба ли да изгледаме како да уживаме?“, по што сите почнуваат да се смеат.

На прашањето ѝ одговара британскиот премиер Борис Џонсон:

„Да дефинитивно“.

Ова не е првпат Елизабета јавно да ја покаже смислата за хумор. Според Los Angeles Times, во 1991 Елизабета држела говор кој поминал одлично.

Но, кога претходниот ден држела говор на истото место, подиумот на којшто стоела не бил приспособен на нејзината висина, па присутните можеле да го видат само нејзиниот шешир.

Следниот ден, кралицата го почнала говорот со:

„Се надевам дека денес можете да ме видите…“

Во 2007-ма, пак, тогашниот американски претседател Џорџ Буш одржал говор во кој зборувал за настан од 1976 на којшто присуствувала и кралицата. Но, во говорот ја погрешил годината и кажал 1776-та.

Следниот ден кралицата држела говор и на шега изјавила:

„Се прашувам дали да почнам со ’Кога бев овде во 1776-та…'“

Елизабета се има шегувано и за нејзините препознатливи костуми со живи бои, а наводно избегнувала облека со неутрална боја. Според кралскиот биограф Роберт Хардман, кралицата рекла:

„Не можам да носам беж боја. Никој нема да знае која сум“.

На оваа тема, кралицата додала и:

„Луѓето треба да ме видат за да поверуваат дека постојам“.

Елизабета се има пошегувано и за нејзината чанта, која ја носи секаде со себе. Според една од книгите на кралската авторка Карен Долби, Елизабета имала гости во палатата, кога ја прашале зошто постојано ја носи нејзината чанта дури и во палатата. Кралицата одговорила:

„Знаете, оваа куќа е многу голема“.

Во 2014-та се појави смешна фотографија од хокеј играчки од Австралија. Фотографијата е селфи, но во заднина можете да забележите како Елизабета ѕирка зад оградата со широка насмевка. Девојките ја споделија фотографијата на Твитер со опис:

„Ах, кралицата ни направи ’фото-бомба‘ на селфито!“

Наводно, нивната објава била споделена и од Твитер профилот на кралското семејство.

И за крај, можеби најдобрата фотографија од Елизабета и нејзиниот сопруг Филип. Фотката е направена во 2005 година во Бакингемската палата, а на неа се забележува дека Елизабета не може да се воздржи од смеење додека го гледа сопругот со кралската униформа со препознатливата голема капа.

Спирова С. | Црнобело