Куче-херој од Филипините спасило новороденче оставено во депонија

Детали

среда, 27 јануари 2021

Кон крајот на декември минатата година, во филипинскиот град Сибонга, еден маж спасил напуштено бебе, и тоа благодарение на помошта од едно куче кое не престанувало да лае по човекот додека тој не тргне по него до местото каде што било оставено бебето.

На 24-ти декември 2020-та година, еден маж по име Хунрел Фуентес Ревила се возел со својот мотор во близина на филипинскиот град Сибонга, кога налетал на улично куче кое не престанувало да лае.

36-годишниот Хунрел застанал и решил да го следи, бидејќи кучето постојано одело по него. Според Cebud Daily News, локален филипински медиум, кучето го однело мажот до една депонија, и таму тој нашол напуштено новороденче завиткано во крпа.

Хунрел веднаш се јавил во полиција и го однел новороденчето во најблиската болница. Подоцна од полицијата изјавиле дека бебето е згрижено и ги замолиле локалните жители да кажат ако имаат некаква информација во врска со неговите родители или личноста којашто го оставила таму.

Наводно, уште не се знае кој го оставил бебето во депонијата, но, најважно, тоа било со одлично здравје.

Кога се расчула приказната, членовите на една организација која згрижува улични кучиња го нашле кучето и сфатиле дека тоа сепак има сопственик.

„Вчера го најдовме кучето херој и потврдивме дека не е улично, туку дека има прекрасно семејство“, пишува на Фејсбук страницата на организација.

Името на кучето е Блеки, а за него се грижи маж, Куја Линдон Олингеј, кој чува дури 9 други кучиња. Целата приказна е уште поневеројатна бидејќи мажот, кој е татко на четири деца, е сиромашен, но сепак го дава најдоброто од себе за своите кучиња.

„Без разлика колку е тежок животот, иако сум сиромашен, ги хранам моите кучиња и добро се грижам за нив“, изјавил тој за филипинските медиуми.

Во знак на благодарност за херојскиот подвиг на Блеки, организацијата собрала храна, намирници и пари за Куја, неговите кучиња и неговото семејство. Истовремено, тие испратиле и ветеринар кој бесплатно ги прегледал и вакцинирал сите кучиња на Куја.

Спирова С. | Црнобело