106-годишна бабичка вторпат го победи корона вирусот – која е тајната на нејзината долговечност?

Детали

петок, 15 јануари 2021

Оваа баба од Англија е инспирација за сите - ги преживеала двете светски војни и три пандемии, го прославила 106-иот роденден откако вторпат го „победила“ корона вирусот.

Мери Николсон живее во дом за стари лица во Англија, а за Нова година вторпат се заразила со корона вирус. Но, токму пред нејзиниот 106-ти роденден, таа добила негативен тест, што значи дека двапати го победила вирусот.

За роденденот Мери изјавила дека сега се чувствува поздраво од кога било, а тврди дека тајната за нејзината долговечност е пиењето полномасно млеко, јадењето путер, но и чашка виски секоја вечер.

Вработените во домот ја разбудиле Мери со торта, честитки и подароци за нејзиниот роденден, а таа вели дека било прекрасно што конечно излегла од изолација и добила толку внимание од нејзините најблиски.

„Тоа беше голем роденден – наполнив 106. Не можам да ви опишам колку прекрасен беше мојот роденден. Беше убаво што добив толку честитки и подароци. Навистина беше убаво што можев да прославам после изолацијата. Се чувствувам добро после вирусот и ништо не може да ме сопре. Ќе се вратам во нормала што е можно побрзо“.

Мери нема сопруг и деца, но вели дека има големо семејство со кое едвај чека да прослави штом ќе заврши пандемијата.

„Многу ги сакам и премногу ми значат. Би сакала да се овде со мене“, вели таа за своите сакани.

Мери е родена во 1915-та година, за време на Првата светска војна. Нејзиниот татко потекнува од Шкотска, но се преселил во Ливерпул за да најде подобра работа. Мери ги преживеала двете светски војни, но и пандемиите во 1918, 1957 и 1968 година. Нејзиниот живот не бил воопшто лесен – мајка ѝ починала кога таа имала пет години, а татко ѝ пет години подоцна.

Според нејзината 68-годишна внука, Мери е силна и независна жена, но и личност полна со љубов.

„Таа немаше лесен живот. Ги изгубила родителите во детството, но не се откажала, работела напорно и до денес ми е инспирација. Таа живееше во нејзиниот дом до 102-годишна возраст. Живееше потполно сама – таа е многу независна жена. Дури и пазареше за една нејзина сосетка која имаше околу 100 години“.

Семејството на Мери и вработените во домот биле исплашени за нејзиниот живот кога таа првпат се заразила со вирусот. Вториот пат не биле сигурни дали таа воопшто ќе преживее.

Но, сега Мери се чувствува одлично, а нејзиното семејство на шега вели дека тајната за нејзината долговечност се „добрата храна и тоа што се држи понастрана од мажи“.

Спирова С. | Црнобело