Ковид мерки: Туристите во Тајланд ќе носат смарт алка што мери телесна температура и им ја открива локацијата

Детали

понеделник, 02 ноември 2020

Ако одлучите да одите во Тајланд среде пандемија, ќе морате да носите алка која наликува на паметен рачен часовник, со цел да се следи вашата локација, но и вашата здравствена состојба.

Кон крајот на октомври, тајландските власти донеле одлука според која на сите туристи кои влегуваат во државата ќе им се дава паметна алка (Smart Band), која ќе мораат да ја носат за време на нивниот престој.

Овој уред ќе ја следи локацијата на туристите, но и ќе им ја мери температурата, крвниот притисок и пулсот на срцето. Ако алката детектира телесна температура повисока од 37,5 степени, веднаш ќе ги извести болниците во близина.

На овој начин, медицинските лица веднаш ќе можат да реагираат – веднаш ќе го лоцираат, ќе му направат тест на пациентот и целосно ќе ја намалат можноста тој да зарази некој друг.

Наводно, алката ќе им биде од голема корист на туристите и ќе им покажува кои места околу нив се под карантин, а ќе им дава и насоки за други локации, како болници или полиција.

Во октомври, Тајланд за првпат ги отвори границите за странски туристи, и тоа само за оние кои имаат специјална туристичка виза, воведена за време на пандемијата.

Според изворите, алката ќе ја носат туристи кои влегле во државата со специјална туристичка виза (STV), а одлуката би требало да важи од ноември.

Засега не е познато дали туристите ќе мора постојано да ја носат алката, ниту пак се знае дали тие ќе треба да плаќаат нешто за неа.

Спирова С. | Црнобело