Канбера стана првиот град во Австралија што ја легализира марихуаната за рекреативна употреба

Детали

среда, 25 септември 2019

После гласањето во вторникот навечер, Канбера стана првиот австралиски град што ќе ја легализира марихуаната за рекреативната употреба.

Од 31-ви јануари 2020-та година, полнолетните жители на Канбера ќе можат да поседуваат до 50 грама сушена марихуана и да одгледуваат 2 растенија, односно 4 по домаќинство.

Сепак, пушењето на јавно место ќе остане забрането, како и продавањето или давањето семе за растенија. Ова е малку нелогично, бидејќи на некој начин, Австралијанците ќе треба да го прекршат законот за да можат да почнат со одгледување.

Според австралиската влада, марихуаната е најкористената забранета супстанца. Во периодот 2017-2018 година, биле направени над 72.000 апсења поврзани со поседување марихуана. 92% од уапсените ја консумирале.

Во Нов Зеланд пак, поседувањето марихуана е сè уште нелегално, но следната година се очекува референдум за легализирање.

Ако Нов Зеланд ја легализира марихуаната, тоа ќе биде само третата држава во светот, после Уругвај и Канада, што ќе го направи тоа. Во 9 држави во САД е дозволена рекреативната употреба на марихуана, а истата е декриминализирана во многу делови од Европа.

Спирова С. | Црнобело