Сто години стариот пакет во Норвешка не содржи решенија за финансиските проблеми

Детали

петок, 24 август 2012

„Сто години стариот пакет не содржи решенија за нашите финансиски проблеми, но наскоро ќе дознаеме што значат работите што ги најдовме внатре“, се пошегува градоначалникот на Гудбрандсдал, по отворањето на 100 години стариот пакет.

Знамиња со националните бои кои се користеле на почетокот од минатиот век кога доаѓал кралот, повеќе писма, некои од САД, протоколи за прослава на национален празник, фотографија од манифестацијата за празникот, неколку тетратки со формат А4 беа најдени во 100 години запечатениот пакет.

Во него имаше и декорации од тоа време, телеграми што се однесуваат на прославата на празникот, како и весници од август 1912 година, и друг од 1909 година.

На пригодна манифестација, со локални гости, министерот за култура на Норвешка, амбасадори, дипломати и други, директорите на Музејот од тој град го отворија пакетот на кој пишуваше „Да се отвори во 2012 година“, а бил запечатен на 26-ти август 1912 година.

Градоначалникот на Гудбрандсдал, ја имаше честа да ги пресече конците со кои беше врзан пакетот со димензии од 28х33х9, што тежеше повеќе од три килограма.

Но внатре најдоа уште една заштитна обвивка и уште конци за врзување, што предизвика смеа кај возбудените директори на Музејот и кај присутните гости во салата.

На едно од знамињата со бела боја и златни реси пишуваше Fra Kongen.

Во пактот не најдоа акции за нафта или мало богатство, како што се шпекулираше, туку сведоштва за едно време.

Директорите на музејот во моментот ги проучуваат документите и тетратките пронајдени во пакетот, а на крајот на програмата која изобилува со национална музика, доделување награди на заслужни граѓани, ќе се вратат на сцената за детално да опишат што содржел пакетот од пред сто години.

Пакетот се чуваше во музеј во Гудбрандсдал,а датира од 26-ти август 1912 година, со порака од Јохан Нигард, локален учител и политики активен во тоа време, кој пакетот во 1912 година му го предал на тогашниот градоначалник да биде отворен за сто години. Тој му рекол на градоначалникот дека содржи работи кои се однесуваат на „бенефитот и светлата иднина на идните генерации".

24.08.2012 (Макфакс)