Исповед на мајка: „Немам пари за екскурзиите на децата – се срамам кога роднините ми нудат помош“

Детали

понеделник, 15 јули 2024

„Ми беше тешко да му соопштам на синот дека нема да оди со другарчињата. Видов како целата надеж исчезна од неговото лице“ – вели мајка од Англија, која објаснува дека морала да донесе тешка одлука и да не го пушти синот на екскурзија, затоа што немала финансии.

Голем број луѓе сметаат дека финансиските проблеми се секојдневие само кај нас, во Македонија, но очигледно е дека со тоа се соочуваат голем број мајки, ширум светот.

Не сме само ние тие што нервозно мора да смислуваме изговори за да не ги пуштиме децата на екскурзија, да бараме брзи решенија за да не им го скршиме срцето.

Таква е и приказната на Шарлот Хигинс (45) од Довер, Англија, мајка на две деца која е вработена во училиште.

Весникот The Sun ја пренесува нејзината исповед, во која таа раскажува како со скршено срце морала да го одбие синот и да не му дозволи да оди на училишната екскурзија, затоа што тоа за неа било едноставно прескапо.

Како што вели, срцето ѝ било скршено кога синот ѝ донел да потпише согласност за училишно патување во Њујорк, коешто чинело 3.000 евра.

„Бев возбудена, но откако го дочитав документот станав вознемирена. Бараа неверојатни 3.000 евра за една недела.

Се чувствував ужасно додека размислував дека тој ќе мора да го пропушти патувањето, а сите негови другари ќе одат во авантура“ – раскажува таа.

Мајката си дала време да размисли и сфатила дека едноставно нема намера да го пушти синот да оди на екскурзијата.

„Ми беше тешко да му ја соопштам одлуката.

Видов како целата надеж исчезна од неговото лице.

Но, му понудив подобро решение.

Му ветив дека сите заедно ќе одиме во Њујорк како семејство.

Се надевав дека ова ќе го смири, и за чудо, така беше“ – раскажува таа.

Шарлот вели дека секогаш се трудела да им овозможи нa нејзините деца да одат на поевтините екскурзии, но овојпат едноставно не можела да си дозволи.

Кога слушнале за екскурзијата, блиските и пријателите се обиделе да ѝ понудат помош за нејзиниот син да оди, но таа ги одбила.

„Тешко е затоа што секогаш се чувствувам засрамено ако прифатам помош. Сакам сама да можам да платам за моите деца“ – вели таа.

Шарлот ја сподели приказната со цел да укаже дека голем број родители често се наоѓаат во вакви дилеми кога треба да платат за патувањата и екскурзиите на нивните деца.

Што мислите вие? Во ред ли е на децата да им се нудат скапи екскурзии кои некои родители едноставно не можат да си ги дозволат?

Б. С. Б. | Црнобело