Родители добиле парична казна во ресторан затоа што децата им биле прегласни и непослушни – Правилно или погрешно?

Детали

среда, 01 ноември 2023

Пар од САД вели дека сопственик на ресторан во којшто биле на ручек им наплатил 50 долари повеќе бидејќи нивните деца биле непослушни. Родителите се бунат, тврдејќи дека нивните деца биле мирни, додека мислењето на јавноста е поделено. Што мислите вие – дали сопственикот на ресторанот е во право или сепак претерува?

Пар од САД остро нападна ресторан откако сопственикот им побарал да платат казна од 50 долари бидејќи нивните деца биле непослушни.

Уште кога седнале во ресторанот, тие забележале дека на менито е истакнато дека родителите чии деца не се примерни ќе добијат повисока сметка, но помислиле дека тоа е шега.

Истовремено, родителите тврдат дека нивните деца се однесувале добро и казната била бесмислена.

Мислењето на јавноста, пак, е поделено.

Линдзи Лендмен и нејзиниот сопруг Кајл биле во ресторан во Џорџија.

Тие биле во друштво на четири други семејства, па на масата имало вкупно единаесет деца, на возраст од три до осум години.

Парот бил во ресторанот пред нешто повеќе од две недели, а тогаш сопругот Кајл оставил и лош коментар на Гугл:

„Сопственикот дојде и ми рече дека додава 50 долари на сметката поради однесувањето на децата. Моите деца си играа на нивните таблети додека да ја донесат храната, потоа јадеа и, на крај, сопругата ги изнесе надвор додека јас ја плаќав сметката“.

Подоцна, во интервју за Today, сопругата Линдзи исто така изјави дека децата биле мирни.

„Децата седеа на едниот крај од масата и беа навистина добри. Дури и им дадов комплимент додека јадеа. Не ми се веруваше колку беа мирни“.

Линдзи вели дека забележала дека на менито пишува дека родителите ќе добијат парична казна ако нивните деца не се однесуваат добро, но помислила дека тоа е шега.

Кога семејствата завршиле со десертот, маж им пришол и им рекол дека ќе треба да платат плус 50 долари бидејќи нивните деца биле премногу гласни и трчале наоколу пред ресторанот.

„Му реков ’Постојано беа тивки‘. Мажот ни се доближи и ни рече дека припаѓаме во Burger King, а не во неговиот ресторан.

Тогаш побаравме да зборуваме со сопственикот, а тој ни рече дека тој е сопственик“, вели Линдзи.

Американската телевизија Channel 2 News стапила во контакт со сопственикот, кој изјавил дека ја вметнал казната во менито пред некоја година.

Тој изјавил и дека не му наплатил на семејството, туку само ги предупредил, како и дека не планирал да се правда за правило што важи во неговиот ресторан неколку години.

По објавувањето на приказната во американските медиуми, многу луѓе кои биле во ресторанот го критикуваа:

„Еднаш отидовме тројца возрасни, две деца и 4-месечно бебе, а уште откако влеговме нè погледнаа лошо.

Потоа сопругата го нишкаше бебето (кое не плачеше) и еден ’менаџер‘ ѝ рече дека не можела да го прави тоа во елитен ресторан (ова не е елитен ресторан)“, гласи еден од коментарите.

Сепак, некои се согласуваат со правилото во ресторанот:

„Јас сум на страната на ресторанот. Бакшишот што ќе го оставите не вреди за некој да го слуша вашето дете како плаче, фрла храна или прави ѓубре.

Зошто да не си го контролирате детето? Ако не можете, јадете дома“.

Што мислите вие – дали сопственикот на ресторанот е во право или сепак претерува?

Спирова С. | Црнобело