Стана најмладата милијардерка во светот со измами, доби 11-годишна казна затвор: Лудата приказна на Елизабет Холмс

Детали

среда, 31 мај 2023

Лажејќи дека има револуционерна технологија за тестирање крв која открива дури и рак, Елизабет Холмс убедила некои од најбогатите луѓе во светот да инвестираат во нејзината фирма. Еден период таа беше прогласена за најмлада милијардерка, но откако се дознаа нејзините измами, амбициозната измамничка си заработи 11-годишна казна затвор.

Можеби периодов често гледате новости за Елизабет Холмс – поранешна извршна директорка на биотехнолошка фирма која почна да отслужува 11-годишна казна затвор.

Пред неколку години, Елизабет беше прогласена и за најмлада милијардерка која сама го стекнала богатството од страна на Forbes.

Но, Елизабет користела измами, по што Forbes го промени ставот и откри дека нејзиното богатство, односно вредноста на нејзината фирма е всушност нула долари.

Па, која е Елизабет и што направи за да си заработи цела деценија во затвор?

Елизабет Холмс е родена во 1984 година во САД. Нејзините родители биле моќни луѓе, а таа самата била амбициозна уште од најрана возраст.

Имено, во детството на сите им кажувала дека кога ќе порасне ќе биде милијардер, без разлика на сè.

Елизабет била одлична ученичка која се истакнувала над врсниците, а подоцна се запишала на хемиско инженерство на престижниот Стенфорд.

Во втора година, таа му предложила на еден од професорите да отворат фирма за биотехнологија и тој се согласил. Ова се почетоците на нејзината компанија Theranos.

Во име на фирмата, Елизабет поднела барање за патент за медицински апарат за тестирање крв. Станувало збор за уред кој се носи на раката и преку кој пациентот може да прима лекови, но и да ја следи својата крвна слика.

На 19 години Елизабет се отпишала од Стенфорд за целосно да се посвети на компанијата.

Компанијата на Елизабет промовирала и тестови со кои може да се забележат состојби како рак и висок холестерол. Според неа, за овие тестови била доволна само една мала капка крв.

Елизабет почнала да собира пари за фирмата и бидејќи нејзината идеја звучела револуционерно, без проблем нашла инвеститори. За краток период, Елизабет имала 700 милиони долари на располагање.

Сепак, таа имала услов за инвеститорите – да не им кажува како функционира нејзината генијална технологија, како и таа да го има последниот збор за што било поврзано со компанијата Theranos.

Всушност, Елизабет била толку таинствена во врска со нејзината технологија, што секој кој влегувал во лабораториите морал да потпишува договор дека нема да каже што видел внатре.

Истовремено, посетителите секогаш биле придружувани од обезбедување, дури и кога оделе во тоалет.

Елизабет била и строг шеф – нејзините асистенти лично проверувале кога секој вработен доаѓал и си одел од работа. За да ги мотивира да остануваат до доцна, таа почнала да служи вечера во канцелариите на фирмата.

Како што вредност на компанијата се зголемувала, Елизабет почна да го привлекува вниманието на јавноста и стана позната во светот на бизнисот.

Таа се појави на насловните станици на Fortune и Forbes, а држеше и панел дискусии со моќни луѓе како Бил Клинтон и Џек Ма.

Продолжува на следната страница...