„Ми кажа дека ќе биде со мене до крај“ – Како Мајкл Џ. Фокс ја возвишува сопругата која 30 години му помага да живее со Паркинсонова болест?

Детали

четврток, 16 март 2023

„Знаев дека може да биде само полошо. Мојата дијагноза беше конечна, но не се знаеше како ќе се развива болеста. Мојата сопруга ми даде јасно до знаење дека ќе биде со мене до крај“ – со овие зборови актерот Мајкл Џ. Фокс ја величи својата сопруга Трејси Полан која 30 години му е потпора додека тој живее со Паркинсова болест.

Пред неколку месеци го фотографираа со инвалидска количка на плажа, како му помагаат да се движи и да стане, но актерот Мајкл Џ. Фокс повторно застана на нозе, со посебна цел – да го промовира својот најнов документарен филм Still: A Michael J. Fox Movie, на филмски фестивал во Тексас, каде го придружуваше и неговата сопруга Трејси Полан.

Актерот кој се прослави со улогата во филмот „Враќање во иднината“ веќе 30 години се бори со Паркинсонова болест, а во рамки на промоцијата повторно одговараше на прашања поврзани со неговата здравствена состојба, па рече:

„Паркинсовата болест е тешка, но имам прекрасен живот. Не жалам за ништо. Го правиш тоа што мора да го направиш, но не сакаш да се убиеш себеси. Тогаш престанав со тоа што го правев.“

Тој упати моќна порака до сите што се соочуваат со ваков тип на болест и им се заблагодари на обожавателите, кои му го вратиле животот.

„(Само)сожалувањето е скриен начин на злоупотреба. Можам да се сожалувам себеси, но немам време за тоа. Постојат многу работи што може да ги научиме од ова, па ајде да го направиме тоа и да продолжиме понатаму“.

Прочитајте и Битката на Мајкл Џ. Фокс со Паркинсонова болест: „Ја имам од 29 години, постојано паѓав и кршев коски, но сега можам да одам сам“

Во продолжение неколку интересни факти за љубовната врска на Мајкл Џ. Фокс и Трејси Полан:

На актерот на 29 години му била дијагностицирана болеста, но тоа не го спречи да живее исполнет живот. Тој е во брак со сопругата Трејси Полан од 1988-ма година, а заедно го добија синот Мајкл (33) и ќерките близначки Аквина Кејтлин и Шајлер Франсес (28), како и 21-годишната ќерка Есме Анабел.

Тие двајца се запознале во 1985-та година кога играле заедно во филмот Family Ties.

На почетокот нивната љубов била платонска, затоа што и двајцата биле во врска со други луѓе во моментот, но 3 години подоцна повторно се сретнале за време на снимањето на филмот Bright Lights по што брзо започнале врска.

По седум месеци врска, парот одлучил да стапи во брак во 1988-ма година и оттогаш па до денес се заедно.

„Трејси му дава на нашето семејство сѐ што му треба. Сѐ што е добро во нашето семејство, доаѓа од неа“ – рече во една прилика актерот.

Неговата сопруга застанала до него во моментот кога ја добил дијагнозата.

„Ми рекоа дека имам уште само 10-тина години за да работам. Тоа беше ужас. Тоа се случи. Најтежок дел од мојата дијагноза е да ја прифатиш неизбежноста на дијагнозата и неизвесноста на целата ситуација.

Знаев дека може да биде само полошо. Мојата дијагноза беше конечна, но не се знаеше како ќе се развива болеста. Мојата сопруга ми даде јасно до знаење дека ќе биде со мене до крај“ – рече тој.

Мајкл Џ. Фокс во 2000-та година основаше своја фондација што треба да им помогне на луѓето што се борат со оваа болест, а иако има голем број периоди на падови, тој и понатаму продолжува да работи и да твори и собира сила да застане пред своите обожаватели и публиката и да го промовира тоа што го сработил, додека неговата сопруга и понатаму е тука за да му даде поддршка.

 Б. С. Б. | Црнобело