„Ако не сакате да ве соблекуваат, не станувајте модел, туку калуѓерка“: Најконтроверзните изјави на Карл Лагерфелд

Детали

недела, 09 октомври 2022

Ана Винтур одлучи Мет галата во 2023-та да биде посветена на дизајнерот Карл Лагерфелд, но веднаш се соочи со критики. Онлајн почнаа да се споделуваат контроверзните изјави на дизајнерот кои покажуваат дека тој бранел силувачи, го поддржувал холокаустот и бесрамно ги навредувал и понижувал жените.

Неодамна организаторите на Мет галата открија дека свеченоста во 2023 година ќе биде посветена на познатиот дизајнер Карл Лагерфелд.

Карл Лагерфелд го врати модниот бренд Chanel во живот, работеше за брендот Fendi, а имаше и своја модна куќа. Тој почина во 2019 година, на 85-годишна возраст. 

Во склоп на Мет галата во 2023 година ќе има изложба од околу 150 модни парчиња дизајнирани од Карл, заедно со негови оригинални цртежи.

Иако дизајнерот е едно најголемите имиња во модната индустрија, одлуката за Мет галата речиси веднаш се соочи со остри критики.

Додека Карл можеби бил генијалец кога станува збор за мода, јавноста почна да се присетува на неговите контроверзни ставови за сè останато.

На пример, тој го бранеше францускиот политичар Доминик Штраус-Кан кој беше обвинет за силување, па дури и му испрати букет цвеќе.

Тогаш дизајнерот изјави дека му било „преку глава од движењето Me Too“ и од жените кои пријавувале силување неколку години по инцидентот.

Дизајнерот редовно кажуваше контроверзни работи и бесрамно ги навредуваше сите.

Па, не е ни чудно што Твитер е преплавен со критики за следната Мет гала:

„Зошто го славиме него, кога има бројни други неверојатни дизајнери? Не се боревме за женските права за да го фрлиме целиот труд поради маж кој правел убава облека за слабички девојки“.

„Без разлика колкав придонес имал Карл во модната индустрија, не треба да славиме личност која даваше расистички и сексистички коментари во текот на целата кариера“.

„Карл го бранеше сексуалното насилство врз моделите. Следната година тој ќе биде тема на ’најголемата модна ноќ‘ бидејќи нема последици за оние кои го бранат сексуалното насилство“.

„Значи, луѓето ќе се појават на црвениот тепих и ќе ги кажат нивните омилени цитати на Карл за дебели луѓе, силување, бегалци и холокаустот. А, има толку многу. Браво Ана Винтур. Одличен избор“.

Во продолжение најконтроверзните моменти од животот на Карл Лагерфелд кои покажуваат зошто јавноста е гневна:

Беше расист

Во интервју од 2017 година, Карл, кој потекнува од Германија, зборуваше за одлуката на Германија да прими бегалци од други земји кои беа муслимани.

„Не можете да убиете милиони евреи, а потоа да примите милиони од нивните најголеми непријатели, дури и ако поминале две децении.

Познавав еден Германец кој во домот зеде млад Сириец и рече: Најубавото нешто што го измислиле Германците е холокаустот‘.

Често ги критикуваше жените и нивните тела

Дизајнерот има кажано навреди за бројни познати жени:

Адел: „Таа е малку дебела, но има убаво лице“. „Не реков дека Адел е дебела, само дека е округла. Округла не значи дебела“.

Хајди Клум: „Хајди не е модел. Премногу е тешка и има многу големи гради. И секогаш прави некој глупав израз на лицето“.

Пипа Мидлтон: „Кејт има добра силуета. Сакам такви убави жени. Од друга страна, сестра ѝ има проблем. Не го сакам нејзиното лице. Треба да си го покажува само грбот“.

Коко Шанел: „Таа никогаш не била феминистка бидејќи не била доволно грда за тоа“.

Принцезата Дијана: „Беше убава и мила, но беше глупава“.

Дизајнерот ги навреди и жените кои сметаат дека некогаш супермоделите се премногу слаби:

„Овие дебели мумии кои седат со нивниот чипс пред телевизор и велат дека моделите се грди… Никој не сака да гледа жени со облини“.

Ги навредуваше и мажите

Музичарот Сил има лузна на лицето поради вид лупус. Но, Карл бесрамно даде коментар и за ова:

„Не сум дерматолог, но не би ја сакал неговата кожа. Мојата е подобра од неговата. Неговата е покриена со кратери“.

Бранеше силувач

Веќе спомнавме дека Карл го бранеше политичарот Доминик Штраус-Кан кој беше обвинет за силување.

Тој ја силувал неговата дадилка, а подоцна го обвинија и други жени.

Но, Карл ја зазеде страна на политичарот, па дури и му испрати букет цвеќе, а притоа даде вознемирувачка изјава:

„Жените се палат на политика, на моќ. А тој (Доминик) има неверојатен шарм. Многу е шармантен. Тој е забавен, одличен дечко – сè додека не сте жена“.

Карл бранеше и стилист кој допирал супермодел, па дури и ѝ ја соблекол долната облека без нејзина дозвола.

Според дизајнерот, супермоделите требало да се помират со вакви ситуации.

„Некаде прочитав дека мора да го прашате моделот дали се чувствува удобно. Ова е премногу. Сега, како дизајнер, не можете да правите што сакате.

Ако не сакате да ве соблекуваат, не станувајте модел. Станете калуѓерка, таму секогаш има место“.

Спирова С. | Црнобело