Криси Тајген за изгубеното бебе: „Ја носиме неговата пепел на патувања, децата му оставаат чаша вода“

Детали

вторник, 26 октомври 2021

Криси Тајген вели дека ја чуваат пепелта на синот Џек што го изгуби минатата година, но и дека ја носат со нив на патувања, а наводно ова им помагало на децата полесно да се справат со загубата и да сфатат дека иако мртво, братчето Џек е сепак со нив.

Во неодамнешно интервју Криси Тајген откри колку се променила откако го изгуби детето минатата година, но и како нејзините деца – 5-годишната Луна и 3-годишниот Мајлс – се справуваат со загубата.

Криси претходно откри дека го кремирале неговото тело, а во интервју за Scary Mommy изјави дека децата неретко инсистираат да ја носат неговата пепел кога одат на некое патување.

„Секојпат кога одиме на одмор или слично, ми велат ’Не го заборавај Џек!‘ И, тогаш треба да го земеме и него“.

Криси вели и дека Луна и Мајлс сакале да оставаат чаша вода до урната.

„Кога ќе тргнеме каде било, ќе речат ’Мора да е жеден‘. Можеби ова им звучи лудо на другите, но тие ставаат мала чаша вода до неговата урна. И, навистина сакаат што се дел од тоа“.

35-годишниот модел открива дека во семејството често зборуваат за Џек, а тоа што ја зачувале неговата пепел им помага на сите, особено на децата, да ја прифатат тажната реалност.

„Кога цртаат нешто на училиште, го цртаат Џек како ангел. Често зборуваме за него“.

Според Криси, нејзините деца претчувствувале дека нешто не е во ред уште неколку денови пред таа да го изгуби Џек.

„Го забележуваа нашиот немир. Еднаш кога отидов во тоалет Луна ме чекаше пред врата и кога излегов ми рече ’Уште ли крвавиш?‘ Знаеше сè. Па, не можев да ги заштитам од тоа, дури и да сакав.

Им кажавме дека го изгубивме бебето, но дури кога ја добивме неговата пепел почнаа да сфаќаат и да велат ’Еве го со нас, не преживеа‘. По ова можевме да им речеме ’Џек е тука и ќе остане со нас‘“.

Таа смета дека иако можеби никогаш нема целосно да ја разберат трагедијата, неговата урна им помага полесно да се справат.

„Можеби еден ден ќе го ослободиме. Сигурно му се допаѓа што уште мислиме на него и уште имаме емоции, но, најмногу од сè, сака што зборуваме за него. Со ова децата знаат дека Џек уште е важен дел од нашите животи“.

Криси вели дека трагичниот настан ја натерал добро да размисли за нејзините животни навики, но и да направи драстични промени.

„Пред да останам бремена со Џек, не водев здрав живот. Не го третирав моето тело како што треба, посебно со алкохолот. Го исмејував вежбањето и ги исмејував пријателите кои беа опседнати со теретана. Па, мислам дека ако го родев Џек, немаше да сфатам колку е скапоцен животот и колку е скапоцено моето тело“.

По загубата на детето Криси била и во депресија, но сега се чувствува подобро и вели дека најмногу се фокусира на малите убави нешта во животот.

„По смртта на Џек речиси и да не излегував – депресијата може да ве уништи. Сега се чувствувам како комплетна личност.

Можеби е смешно, но ми помагаат малите нешта. Сакам да слушам музика и сакам да се возам со моите деца. Сметам дека сум подобра мајка, подобра сопруга и подобра пријателка“.

Криси соопшти дека го изгубила синот Џек на крајот од септември минатата година, откако неколку денови имала обилно крвавење.

Спирова С. | Црнобело