Преживеала 16 операции – Тешката животна приказна на младата ѕвезда од Modern Family

Детали

сабота, 18 септември 2021

Американската актерка Сара Хејланд се прослави со улогата на Хејли Данфи во серијата Modern Family, а гледачите низ светот ја обожаваат поради нејзината „просечна интелигенција“ прикажана на хумористичен начин.

Во приватниот живот, Сара е потполно поинаква, а сигурно може да ја вброиме и помеѓу похрабрите.

Актерката од своето раѓање се бори со дијагноза наречена дисплазија на бубрезите, што значи дека бубрезите не ѝ се доволно развиени, за да ја извршуваат својата функција.

Во 2012-та година нејзиниот татко ѝ го донирал сопствениот бубрег.

Сара во повеќе интервјуа открива дека периодот по трансплантацијата бил еден од најтешките. Иако работите се чинеле дека одат на подобро, неколку години подоцна нејзиното тело го одбило бубрегот, па морала да се врати под нож.

По 6 месеци докторите откриле дека и нејзиниот брат Иан е соодветен донор, па овојпат тој ѝ го дал својот бубрег.

Оваа трансплантација ја поминала многу полесно, како и опоравувањето, но неколку месеци подоцна се вратила во болница со друга причина.

Дијагностицирана ѝ била ендометриоза на матката и јајниците, па повторно итно се оперирала.

Во своите 30 години, Сара имала дури 16 операции, а повеќе од 10 ѝ биле направени додека го снимала најголемиот проект во животот – серијата која ја прослави.

М. Д. | Црнобело