Куќна помошничка открива како е да се работи за познатите: „Може да им се случи да немаат пари да ви платат“

Детали

сабота, 18 септември 2021

На познатите личности може да им се случи да немаат пари да ви платат во моментот. Нивните куќи се големи, треба да внимавате на големиот број скапи предмети. Како е да се работи како куќна помошничка за познатите?

Анџела Браун од САД е јутуберка која редовно објавува видеа на нејзиниот YouTube канал Ask a housecleaner.

Во едно од нејзините видеа таа открива како е да се работи и да се чисти во куќите на познатите и кои работи треба да ги очекувате.

Таа зад себе има 25-годишно работно искуство како куќна помошничка, а нејзиното искуство воглавно се сведува на работа во куќи на познати спортисти, банкари и директори.

Застрашувачки е да се работи за познатите

Првата работа на која помислувате кога влегувате да работите во куќа на некој од познатите е дека сте многу далеку од нивниот стил на живот и дека сте под нивното ниво.

Во таков случај, мора да бидете свесни дека и тие исто така се луѓе, а дека вие доаѓате како професионалец и треба професионално да си ги завршувате задачите.

Тие се најдобри во тоа што го работат, но вие сте добри во тоа што го работите, па затоа и ве ангажирале.

Голем број познати имаат проблеми со парите

Како што вели Анџела, воопшто не е чудно и познатите личности да немаат пари да ви платат во моментот. Иако нивното богатство може да тежи милиони или милијарди, сепак тие пари се врзани за инвестиции и честопати може да се случи да немаат пари во кеш за да ви платат, па да побараат да почекате за исплата.

И тие имаат секојдневни обврски

Можеби ви се чини дека познатите личности е доволно само да постојат, сепак и тие имаат секојдневни обврски како и сите обични луѓе.

И кај нив треба да исперат алишта, и кај нив треба да се исчисти тоалетот, да се фрли ѓубрето. Така што за куќните помошнички ова значи дека ги имаат истите работни обврски како и во секоја друга куќа, но тука сè е во многу поголеми размери.

Треба да работите бавно

Познатите имаат мошне големи куќи и имаат многу повеќе предмети во домот. Куќните помошнички особено треба да внимаваат на вредните предмети.

Освен што имате многу повеќе површини од коишто треба да избришете прашина, треба да внимавате на уметничките дела, на скапите садови или скапите светилки.

Поради тоа, иако од вас се бара да бидете ефикасни, не можете да си дозволите да работите брзо и треба постојано да внимавате.

Мора да бидете доверливи

Каде и да работите важно е да бидете доверливи како личност. Куќните помошнички се сведоци на речиси сè што се случува во домот, но не треба да говорат за тоа во јавност.

Тоа правило важи како за просечните луѓе, така и за познатите личности.

И тие се разболуваат и имаат тешки денови

Исто како и обичните луѓе и на славните и познатите им се случува да се разболат, да имаат проблеми со изгледот или да имаат тешки денови. Особено ако се земе предвид дека кај нив нивото на стрес во работата е можеби многу поголемо.

Затоа што тие постојано мора да бидат во улога, да ја одржуваат таа персона што ја креираат во јавноста, а за таа цел мора да се придржуваат до стриктно определени правила.

Со други зборови, тоа што имаат пари, не значи дека се бесмртни.

Б. С. Б. | Црнобело