„Ќе ја докажам мојата невиност“ – Џони Деп присилен да даде отказ од Warner Bros. откако судот утврди дека ја малтретирал Амбер

Детали

сабота, 07 ноември 2020

Џони Деп беше прогласен за виновен после тврдењата на Амбер дека ја малтретирал. Кратко по пресудата, актерот добил наредба од Warner Bros. да се повлече од улогата во франшизата Fantastic Beasts.

Пред неколку денови, Џони Деп го изгуби спорот со Амбер Херд. Поранешната сопруга на актерот тврдеше дека тој бил насилен и дека ја удрил неколкупати, а се однесувал како „чудовиште“ кога бил под дејство на алкохол и наркотици.

После 16-дневното судење, судијката пресудила во корист на Амбер, обвинувајќи го актерот дека ја удрил неколкупати додека беа во брак.

Адвокатите на актерот, пак, сметаат дека пресудата е неоснована и дека актерот не е виновен. Наводно, најмногу им пречело тоа што судијката се потпирала само на сведочењето на Амбер, а ги игнорирала бројните докази кои јасно укажувале дека таа лаже.

Актерот ќе треба да ѝ исплати голема сума на Амбер, но пресудата веќе почна да влијае и врз неговата кариера – тој добил наредба од Warner Bros. да се откаже од улогата во популарниот Fantastic Beasts, и покрај тоа што веќе има снимено неколку сцени за новото продолжение.

Филмот е „спиноф“ од серијалот Хари Потер, а Деп ја имаше улогата на злобниот волшебник Гринделвалд. Многумина веруваат дека поради овој настан, на холивудската кариера на Џони ѝ дошол крајот.

„Ова е ужасно за Деп. Сега тој е обележан. Засекогаш ќе биде познат како тепач на жени, пијаница и наркоман“, изјавил еден адвокат.

Самиот Џони ги соопшти новостите, изјавувајќи дека ќе се бори против оваа неправедна пресуда.

„Поради неодамнешните настани, би сакал да изјавам нешто кратко.

Најпрво, сакам да им се заблагодарам на сите што ми ја дадоа нивната поддршка и нивната лојалност.

Трогнат сум од многуте ваши пораки полни со љубов и грижа, особено последниве неколку денови.

Второ, би сакал да знаете дека Warner Bros. ми рекоа да се откажам од улогата на Гринделвалд во Fantastic Beasts, и го испочитував и се согласив со тоа барање.

За крај, сакам да го кажам ова.

Нереалната пресуда на судот во Велика Британија нема да ме спречи да се борам да ја кажам вистината и планирам да поднесам жалба.

Имам намера да докажам дека обвиненијата против мене се лажни. Мојот живот и мојата кариера нема да бидат дефинирани од овој момент“, напишал актерот.

Од студиото, пак, изјавија:

„Џони Деп ќе си замине од франшизата Fantastic Beasts. Му благодариме за досегашната работа на филмовите. Моментално Fantastic Beasts 3 е во продукција, а за улогата на Гринделвалд ќе најдеме друг актер. Филмот ќе има премиера во кината ширум светот во летото 2022“.

Многу луѓе сметаат дека обвиненијата биле многу сериозни, но повеќето фанови застанаа на страната актерот. Истовремено, тие го критикуваат Warner Bros. поради одлуката да го избркаат Деп, а почнаа и петиција за отстранување на Амбер од новото продолжение на филмот Aquaman. И ова е филм на Warner Bros. во кој актерката има една од главните улоги.

Амбер и Џони ги очекува уште едно судење – актерот ја тужеше поранешната сопруга поради текст во The Washington Post каде што таа зборува за домашното насилство и тврди дека Џони е насилен кон жените. Судењето е закажано за мај 2021-ва.

За време на судењето што го изгуби Џони, се дознаа навистина чудни работи за него и Амбер. Наводно, актерот користел многу кокаин, трошел 30.000 долари месечно за вино, изгубил 650 милиони долари, должел 100 милиони во даноци и ја нападнал Амбер неколкупати додека биле во Австралија кога бил под дејство на алкохол и наркотици.

За Амбер, пак, се расчу дека имала афера со милијардерот Илон Маск и дека оставила нејзин измет на брачниот кревет што го делеа со Џони.

Деп изјави дека не е виновен за ништо од горенаведеното, но и дека Амбер била таа што го напаѓала. Истовремено, тој ја опишал Амбер како „спонзоруша“.

Џони и Амбер се запознаа на сетот на The Rum Diary во 2009-та, а се венчаа во 2015-та. Нивната врска почна да се движи во погрешна насока само околу една година после венчавката, а допрва ги чекаат уште судски спорови.

Спирова С. | Црнобело