Прва семејна турнеја за Хари, Меган и Арчи - пристигнаа во Африка (фото)

Детали

понеделник, 23 септември 2019

Војводата и војвотката од Сасекс заминаа на првата заедничка тура во Јужна Африка и ќе го посетат „главниот град на убиствата“.

Хари и Меган ќе го посетат Нјанга, град веднаш до Кејптаун и место каде што секоја година се убива еден во 206 жители.

Кралскиот пар ќе биде придружен со засилено обезбедување, а до последниот момент нема да бидат откривани никакви детали.

Хари, Меган и нивниот син Арчи, утрово пристигна во Кејптаун, а папараците веднаш ги забележаа. Меган беше фотографирана со 4-месечниот Арчи, кој носеше преслатка капа.

Најмладиот член на кралското семејство навистина наликуваше на неговиот татко, кој е фотографиран на сличен начин во рацете на неговата мајка Дијана.

Хари изјавил дека едвај чекал да го запознае Арчи со Африка.

Портпаролот на Бакингемската палата вчера изјави:

„Како што веќе знаете, Африка има посебно место во срцето на војводата и тој едвај чека да го сподели искуството со војвотката и нивниот син. Ова е навистина полна програма, четири држави за десет дена, а имаме и мал патник кој ќе го направи патувањето поживо.“

Парот стигна во Африка со комерцијален лет од Лондон, но одлучиле дека не сакаат никаков официјален пречек. Наместо тоа, тие решиле да поминат низ VIP излезот и веднаш да се упатат кон нивното сместување.

Поради зголемената стапка на криминал и неодамнешните демонстрации против насилството врз жените, голем дел од планот на парот нема да биде објавен однапред.

Познато е дека Меган и Хари ќе присуствуваат на настан за готвење, а подоцна Меган ќе присуствува на настан со локална група, што им помага на мајките кои живеат со ХИВ.

Голем дел од активностите на Меган и Хари се фокусирани врз проблемот со насилството врз жените. Дури и претседателот, Сирил Рамафоза, изјавил дека ова е едно од најопасните места за живеење за жени, поради зголемениот број случаи со насилство врз нив.

За време на посетата на Нјанга, малиот Арчи ќе остане со неговата дадилка.

Спирова С. | Црнобело