Љубовното писмо кое го разнежни светот

Детали

понеделник, 22 септември 2014

За време на модната недела во Милано, каде нивниот бренд е секогаш во центарот на вниманието, Стефано Габана го објави љубовното писмо испратено до неговиот долгогодишен соработник, и до пред извесно време, љубовен партнер.

Креаторот Стефано Габана ова писмо го објави во италијанскиот дневен весник Corriere della Sera, по цели 29 години поминати со Доменико на љубовно и работно поле.

Еве што пишуваше во него...

„Драг Доменико,

Никогаш до сега не сум ти напишал писмо. Мислам дека тоа беше непотребно, затоа што никогаш не ми беа потребни зборови за да го опишам она што го чувствував кон тебе. Ти и јас бевме едно. Ние дишевме како едно. Доволен беше еден поглед, за да знаеме што мисли другиот. Да, ова е прв пат да ти пишувам, и морам да ти признаам, се чувствувам малку чудно.

Нашите разговори беа како пинг-понг игра - јас започнувам мисла, ти ја завршуваш, ти сакаш да споделиш некој впечаток, јас те прекинувам, односно го кажувам токму тоа што ти сакаше да го кажеш. Сега кога пишувам, се ми се чини чудно и поинаку, затоа што во раката имам молив и лист хартија. Зборовите ми изгледаат некако тешки, а ние сме многу повеќе од зборови и засекогаш ќе бидеме.

Брендот го започнавме буквално од нула, но го изградивме со љубов и неверојатна страст која ја обликуваше и хранеше нашата љубов. Се потпиравме еден на друг, меѓусебно се поддржувавме, успевајќи да ги надминеме сите препреки и предрасуди. Дури и денес, кога веќе не сме заедно, благодарение на тоа чувство, на таа нераскинлива врска, ние продолжуваме да работиме заедно и заедно да се соочуваме со среќни и тажни моменти кои животот ни ги режира. Ти си моето семејство и секогаш ќе бидеш.

Поминаа многу години откако те запознав и сè се промени, а истовремено и сè остана исто. Емоциите кои тогаш ги чувствував, само се трансформираа во друг облик, носејќи ми спектар на прекрасни чувства. Ти и јас секогаш ќе бидеме нешто единствено во мојот живот, како и писмово кое ти го пишувам.

Те сакам,

Стефано.“