5 филмови помеѓу оние со најголема заработка, кои не ја заслужуваат истата

Филмската индустрија го достигнува својот врв во моментов, меѓутоа за жал, само од аспект на гледаност. Чест на исклучоци, одамна се нема случено да гледаме „Оскари“ на кои во конкуренција за најдобар филм ќе бидат два или повеќе ударно моќни филмови (добри на повеќе нивоа). 

Секоја чест за специјалните ефекти и акцијата во новите филмови, меѓутоа доколку го тргнете тоа, ќе видите дека овие филмови се сепак празни.

Овие 5 филмови се помеѓу оние со најголема заработка, а погледнете и зошто не ја заслужуваат истата:

Avatar

Филмот со најголема заработка на сите времиња која изнесува 2.788 милијарди долари. Филмот сам по себе не беше лош, имаше солидна глума и сценарио, меѓутоа повеќето од нас би се сетиле на одреден анимиран филм наречен „Покахонтас“.

Заменете го вонземјанското локално племе со Индијанците од земјата, и „лошиот“ белец со... лошиот белец, во чии редови има еден „добар човек“ кој се заљубува со девојка од локалното племе, па решава да смени страна...

Единственото нешто што фали во Avatar за да би бил ист како Покахонтас, е веројатно малиот Ракун, кој е заменет со некое друго вонземјанско суштество.

Заклучок: Му фали оригиналност.

Titanic

Втор на оваа листа е Титаник, кој има заработка од 2.187 милијарди долари. Секоја чест за достигнувањата, меѓутоа да не беше пишувано базирано на вистинит настан, не верувам дека овој филм ќе беше толку успешен.

Поради самото тоа што е базирано на вистински настан, и е една од поголемите трагедии своевремено, ќе се воздржам од понатамошно критикување.

Заклучок: Можеше да ги собере и двајцата на даската.

Star Wars: The Force Awakens

Филм кој заработи 2.066 милијарди долари, а не заслужи ни $5... Доколку прашате обожавател на Војна на ѕвездите што мисли за филмот, тој ќе го сфати тоа како лична навреда. Токму тоа и е овој филм за неговите претходници.

Секоја чест за одличниот маркетинг и специјалните ефекти, меѓутоа Војна на ѕвездите тип на филм во кој Сит Лорд губи дуел од обичен Сторм трупер и девојче кое првпат во животот гледа како изгледа лајтсејбер, не заслужува да го носи истиот наслов со неговите претходници.

Деловите 4, 5 и 6 замислете се создадени во '70-тите односно '80-тите, и за почит е тоа што Џорџ Лукас го направил со тоа што го имал на располагање.

Желбата за пари и американизирање на ова парче уметност, успеа да го уништи она светото за секој обожавател на Војна на ѕвездите.

Заклучок: Овој филм е репетитивен, и не нуди ништо ново за љубителите на оригиналните делови.

Avengers: Infinity War

Ова е филм кој сè уште игра во кината, па во моментов има заработено само 1,904,688,638 долари. Одличен филм за сите љубители на Марвел светот, и општо филмови со супер херои, меѓутоа како парче филмска уметност е далеку од тоа што треба да биде.

Специјалните ефекти и акцијата се на одлично ниво, меѓутоа откако ќе ја отстраните шминката на овој филм, гледате дека е празен и несодржаен.

Станува збор за луѓе кои се гладни за пари, и успеале да натрупаат на едно место милион супер херои и специјални ефекти, и класично американски полукомични моменти.

Ова е одличен филм за гледање во кино, каде што всушност ќе можете да ги доживеете сите ефекти.

Заклучок: Ги задоволува хоби потребите на светската популација, а љубителите на филмот како уметност ќе останат запоставени.

Jurassic World

Филм од 2015-та година, а не оној стариот од кој собиравме сликички. Филм кој нема ниту оригинална музика, ниту добри глумци, ниту пак добри ефекти (во споредба со другите филмови на листава).

Овој филм навистина не знам како стигнал до заработка од 1.671,713,208 долари. Животните се премногу компјутеризирани, постојат премногу нелогичности во филмот (како на пример девојка во штикли која трча побрзо од Т-рекс) и квази-романтична приказна.

Заклучок: Гледајте го филмот од 1993-та...

еНВи | Црнобело