„Татко ми ми рече дека тој свет е подмолен“: Елена Ристеска со емотивна објава 20 години по победата на М2
- Детали
- четврток, 22 декември 2022
„Кога дознаа дека сум влегла во 100-те полуфиналисти, татко ми ми рече: Елена тој свет е подмолен и сè е наместено, немој да се разочараш“, открива пејачката во емотивната објава по повод 20-тата годишнина од нејзината победа на М2 Потрага по ѕвезда.
Пред точно 20 години, Елена Ристеска победи на шоуто М2 Потрага по ѕвезда и не помина долго пред да стане најпопуларната пејачка во Македонија.
По повод 20-тата годишнина, пејачката сподели неколку фотки и инсерти од нејзините музички спотови и настапи, а во описот откри колку ѝ се променил животот по победата.
„На овој ден, 22.12.2002 год. или точно 20 години откако „девојчето со чорапчињата“ победи на аудицијата „М2 Потрага по ѕвезда“ на М2 продукција, основана од Иво Јанкоски и Дарко Димитров, на кои и ден денес сум им благодарна за шансата која ми ја дадоа да започнам своја музичка кариера и да може публиката да ме чуе и запознае.
Од 2000 кандидати успеав да влезам во 100-те финалисти пеејќи песна од мојата драга другарка Каролина Гочева од која исечок можете да слушнете на следна страна (на стрелките на Инстаграм линкот).
Потоа, бев една од 10-те финалисти на финалето на М2, каде сите пеевме своја песна и каде победив со мојата прва песна „Она другото“ (второто видео). Токму од тој момент мојот живот од анонимен стана јавен и целосно се промени.
Започнаа да се редат песни, спотови, албуми, концерти, насловни страни, интервјуа, ТВ и радио гостувања, настапи низ цела држава и пошироко, фестивали, Евровизија во 2006-тата, турнеи низ светот итн.
И најдрагото нешто од сето тоа ми е што стекнав свои обожаватели, кои и ден денес се тука за мене. А благодарение на Бог кој ми го дал гласот, јас 20 години за нив пеам и постојам.
Паметам и ден денес дека моите не знаеја дека сум пријавена на некаква аудиција, единствено сестра ми која ми е и ден денес најголема поддршка.
Кога дознаа дека сум влегла во 100-те полуфиналисти татко ми ми рече: „Елена тој свет е подмолен и сè е наместено, немој да се разочараш. Јас му одговорив: „Тато, само сакам да си докажам на себе дека можам, не ми е важно ништо повеќе“.
Кога победив моето семејство беше шокирано, а нивното „малецко“ успеа да докаже дека може. Низ сите овие години, покрај сестра ми и татко ми кој ме поддржува од „таму некаде“, мојата најдрага мајка Деса го посвети својот живот да ми помага во животот и кариерата, без која немаше да постигнам ништо.
Внука ми Делфи е мојот нов фан и се надевам дека ќе ме наследи еден ден.
И после 20 години, јас сум истата Елена, иако многу нешта се променија. Иста е мојата љубов кон ВАС и кон музиката. ВЕ САКАМ“.
Спирова С. | Црнобело
Би можело да ве интересира:
Препорачуваме
Најчитани неделава
