„Се молам да не заплачам додека пеам“: Ивона Јо ги испеа омилените песни од Тоше во Крушево

Детали

четврток, 25 јануари 2024

„'Игри без граници' и 'Полско цвеќе' не можам да ги пеам, да дадам емоција, а да не се расплачам. Како ќе ги испеам денес, на денот на неговиот роденден, навистина не знам. Се молам да издржам“, кажа Ивона Јо за CRNOBELO.com пред концертот во Спомен куќата на Тоше во Крушево.

Во Спомен куќата на Тоше Проески во Крушево, пејачката Ивона Јо денес (25.01) го одржа концертот насловен „Ангел си ти“. Настапот за кој се подготвува од март 2023, кога првпат ѝ кажале дека сакаат токму таа да пее на 43-иот роденден на Тоше, вели ѝ разбудил многу емоција и пред да запее.

„Не знам како ќе пеам без да заплачам. Се молам да издржам“, вели таа за CRNOBELO.com.

Во еден час, колку што трае концертот, таа и нејзиниот бенд ги испеаја омилените песни од Тоше и со тоа го одбележаа денот на неговото раѓање, 25 јануари.

Ивона, чиј настап не поминува без неколку хитови од омилениот македонски пејач, вели дека често знае да се расплаче кога ги пее неговите песни.

„Омилени песни од Тоше ми се две и тоа 'Го молам ноќва небото да ми те врати' и 'Боже чувај ја од зло'.

Самиот мотив и во двете песни е дека него веќе го нема и дека го моли Бога да ја чува неговата сакана.

Не можам, а да не се наежам дур ги пеам овие две песни, кои ми даваат чувство на празнина во душата бидејќи него веќе го нема.

Иако, секогаш кога пеам негови песни и сум присутна во моментот - го чувствувам неговото присуство низ стиховите и мелодиските линии. Тој живее низ неговите песни во нас“, вели Ивона.

Таа ни откри и дека најтешки песни за пеење ѝ се „Игри без граници“ и „Полско цвеќе“.

„Не можам да ги пеам, да дадам емоција, а да не се расплачам.

Како ќе ги испеам денес, на денот на неговиот роденден, навистина не знам. Се молам да издржам…“, искрена е таа.

Ивона за овој настап се подготвувала повеќе од 10 месеци.

„Датумот го знам од март 2023. Огромна чест и задоволство ми претставува тоа што токму јас сум избрана да пеам на еден ваков голем ден. И тоа не каде било, туку во неговиот меморијален центар.

Задоволството е големо, но и голем предизвик е еден час да пееш песни од нашиот великан.

А, јас знам дека ќе биде тука и ќе нè слуша“, ни кажа Ивона.

Пред концертот, Ивона го посети и гробот на Тоше каде што положи цвеќе, а запали и свеќа.

На гробот, како и сите претходни години, имаше роденденска торта. Овој пат тоа беше торта со неговиот лик, со златни детали и свеќички со бројот 43.

Повеќе фотографии и видеа на следната страница...