Драган Спасов Дац и неговата сакана Весна се венчаа – таа тајно ја организирала венчавката како изненадување за роденден (фото+видео)

Детали

среда, 20 април 2022

„Ова може само оваа до мене лудача да ми го направи, браво, сега стварно се потресов!“ - вели актерот. Со тајна организација, заедно со најблискиот круг на семејството и пријателите, партнерката на Дац купила бурми и викнала матичар на неговата роденденска забава, каде ја крунисаа љубовта - ексклузивни фотки и видео од прекрасниот момент, за CRNOBELO.com.

По повеќе од една деценија љубов и заеднички живот, Драган Спасов Дац и неговата избраничка Весна официјално стапија во брак на 19.04.2022.

„Знам дека таа е целиот мој живот и таа е жената која точно се вклопи во моето сè. Љубов, огромна љубов е во прашање, а тоа е единствениот рецепт за среќа...“, изјави во една прилика Дац за CRNOBELO.com за својата сакана.

Денес, на 20-ти април 2022, нашиот актер полни 59 години, а по тој повод имаше роденденска забава минатата вечер во скопскиот локал Трибека, каде истовремено имаа и свирка заедно со Александар Митевски.

Како изненадување на вечерта, неговата долгогодишна партнерка Весна, во најголема тајност, со помош од сестрата на актерот, кумот Александар Митевски и нивните најблиски пријатели, организираше венчавка.

Весна имала возбудлив период во кој морала да организира матичар, да избере и купи бурми, да нарача бидермаер, а за сето тоа никако да не дознае нејзиниот партнер.

Во прекрасна атмосфера, во кругот на најблиските, но и на гостите во локалот, со насмевки на лицето, Драган и Весна го ставија својот потпис и ја крунисаа љубовта на која сведочеа кумот Александар Митевски и старосватицата Сандра Гавриловска.

Во еден момент од вечерта, Александар Митевски ја пее „Happy Birthday“ за да му го честита роденденот на Драган, а веднаш потоа со музика доаѓа невестата со вел кон него на бината, додека тој целосно изненаден и со насмевка ја пречекува.

„Ова само може оваа до мене лудача да ми го направи, не ми се верува. Браво! Е сега стварно се потресов“ – вели Драган на микрофон.

Честитки за парот!

Видео од изненадувањето:

Ексклузивни фотографии:

©CRNOBELO.com Забрането преземање и копирање. Крадењето на авторски текстови е казниво со закон.

М. М. | Црнобело