Позитива на денот: Бебиња облечени како новогодишни подароци – носат радост во 2021

Детали

понеделник, 04 јануари 2021

Дефинитивно ни се потребни повеќе позитивни вести за среќен почеток на 2021, а фотките од бебиња облечени како новогодишни подарочиња во скопска болница ни ги греат срцата.

Симбол за нов живот, радост и среќен почеток на новата година, за која сите се надеваме дека ќе биде поубава од претходната. Токму такви емоции будат овие фотки од бебиња облечени како новогодишни подарочиња на Одделот за неонатологија и интензивна нега во „Аџибадем Систина“.

Во буквална смисла, бебињата се најголем подарок за родителите и семејството, а од болницата добиле одлична идеја да го прикажат тоа на симболичен начин. 

На официјалната Фејсбук страна на „Аџибадем Систина“ беа објавени преслатки фотографии од бебињата за разубавување на првото празнично утро од 2021, а во описот стои:

Првото празнично утро во новата 2021 година беше вистинска радост за сите на Одделот за неонатологија и интензивна нега во „Аџибадем Систина“! Бебињата облечени како новогодишни подароци ги стоплија срцата на мајките кои со нетрпение чекаа да ги земат во прегратка, но и персоналот кој се грижеше за нив.

Малите ангелчиња направија несекојдневна глетка на нашиот оддел која е одличен почеток за новата година. Среќни сме што нашиот гест беше пријатно изненадување и симболичен почеток за новата година.

Со задоволство ги споделуваме фотографиите кои ја разубавија нашата нова година.

М. М. | Црнобело / фото: Аџибадем Систина