Студентката Јована Спасиќ od ФДУ победи на фестивалот „Денови на Данило Лазовиќ“

Детали

среда, 30 октомври 2019

Јована Спасиќ, студентка на „Факултетот за драмски уметности во Скопје“, победи на фестивалот за рецитирање поезија „ Денови на Данило Лазовиќ“, чие седмо издание се одржа во Прибој- Србија, од 22 до 25 октомври, соопштија од ФДУ.

Спасиќ, која во моментов е трета година актерска игра, работеше под менторство на проф. д-р. Тихомир Стојановски кој на ФДУ предава сценски говор, инаку во класата на проф. др. Сузана Киранџиска и Кристина Леловац.

Лауреатката победи со песната од Петре М. Андреевски, „ Ти направи едно нешто што се прави еднаш“.

Жирито во состав проф. др. Радован Кнежевиќ, актерката Даница Максимовиќ, актерката Јелена Стајковац, оперскиот пејач Оливер Њего и актерот Душан Ковачевиќ беа оние кои одлучија дека Јована е најдобра на овогодишниот фестивал.

Прибој, родниот град на актерот Данило Лазовиќ, уште еднаш ја покажа почитта кон овој голем уметник. Неговите колеги и пријатели секоја година присуствуваат на овој настан и ги поддржуваат младите талентирани студенти кои се натпреваруваат во рецитирање поезија – она што и Данило многу го сакаше и често го правеше.