Каролина со моќна порака од Германија: „Тажно е што кога од многу страни сакаат да нè згазат, ние се газиме меѓу себе“

Детали

понеделник, 02 декември 2024

„Вечерашниов концерт бил бојкотиран, се испраќале апели да не се присуствува. Притоа, бојкотот не е ни од Грци, ниту од Бугари, ниту од овие вчера што ни го газеле знамето, туку од македонско друштво од Дизелдорф“, вели разочарано Каролина и повика на сплотеност меѓу Македонците.

Поп-ѕвездата Каролина Гочева во изминатиот период имаше концертна турнеја низ неколку германски градови.

Успешните концерти, добрата атмосфера и дружењето со нашинците, на момент беа засенети од немил настан кој се случувал во очи концертот.

View this post on Instagram

A post shared by Karolina Goceva (@karolinagocheva)

Имено, Каролина на настапот во Дизелдорф откри дека неколкумина македонски иселеници, преку едно од друштвата на иселениците, повикувале на бојкот на нејзиниот концерт во овој град.

Каролина не го криеше разочарувањето, но и покрај тоа повика на сплотеност и поддршка на Македонците и ширење љубов меѓу луѓето, а не омраза и ставање „сопки“.

Во видеото кое се споделува на социјалните мрежи, Каролина вели:

„Пред неколку дена дознав за еден пример кој не е толку светол, а морам да го спомнам вечерва. Претпоставувам дека некои од вас ќе знаат за што ќе кажувам сега.

Ова се случувало од пред неколку месеци, откако објавивме датуми за концертите низ Германија, но јас дознав пред неколку дена - добро ме чувале нашите организатори.

Вечерашниот концерт бил постојано бојкотиран, се испраќале апели да не се присуствува вечерва.“

По ова публиката почнува да вика „уааааа“ и „уууу“, но Каролина ги запира.

„Стоп. Не, ве молам, нема потреба од тоа. Ние тука шириме љубов, но мора да си кажеме што имаме.

Притоа, бојкотот не е ни од Грци, ниту од Бугари, ниту од овие вчера што ни го газеле знамето, туку од македонско друштво од Дизелдорф.

Затоа сакам да ве замолам нешто. Доколку сте утре овде и сте слободни, или ако не сте, ве молам пробајте да се ослободите и не го пропуштајте утрешниот настан, кој го организира македонското здружение, каде настапуваат моите драги колеги Зуица и Наум.

И во иднина, не пропуштајте ниеден настан организиран од Македонците за Македонците, без разлика за која сфера станува збор.

Малку сме и навистина е тажно да не се поддржуваме и да не се чуваме едни со други, а уште потажно и погубно, е што во еден ваков период, кога од толку многу страни сакаат да нè згазат, ние се газиме меѓу себе“.

Погледнете го видеото:

А. Ј. | Црнобело