Македонски и регионални јавни личности кои биле жртви на булинг

Детали

сабота, 28 септември 2024

Ивона Јо, Александра Пријовиќ, Лука Модриќ денес се познати личности со многу фанови, но како деца и во младоста биле жртви на булинг. Кои други познати личности од кај нас и регионот поминале низ ова и какви се нивните приказни? 

Многу наши и регионални личности кои денес ги мотивираат младите, во текот на своето растење се соочувале со булинг, навреди и малтретирање од своите врсници.

Но, тоа што поминале низ толку тежок период, од една страна ги направило посилни, а од друга страна им дава мотив да бидат „гласни“ и да зборуваат против булингот, а со тоа и да ги поттикнат младите генерации да се спротивстават на врсничкото малтретирање или да им помогнат да го надминат полесно она со што се соочуваат.

Жртви на булинг има насекаде околу нас, не се само јавните личности во прашање.

Но, нивните приказни полесно допираат до јавноста и до оние на кои најмногу им треба помош и внимание.

Ова се неколку познати личности од Македонија и регионот кои биле жртви на булинг и нивните приказни:

Ивона Јо

Нашата пејачка не крие дека уште од дете била жртва на врснички булинг, поради прекумерната тежина, но дека и денес често добива пораки на социјалните мрежи со навредлива содржина и лоши коментари.

Таа во интервју за CRNOBELO.com, изјави дека булинг трпела уште во основно училиште поради физичкиот изглед, а бидејќи во тоа време не се зборувало гласно и отворено за проблемите со кои се соочувале жртвите на булингот, таа молчела и верувала во зборовите кои ги изговарале оние што ја малтретирале.

Иако е свесна за тоа што се случува, Ивона вели дека ни денес не е имуна на коментарите и дека понекогаш знаат да ја повредат.

Александар Динев

Младиот тиктокер Александар Динев е уште една жртва на булинг кај нас.

Тој неколкупати зборувал на оваа тема, а во една пригода изјави дека булингот доаѓал од децата во училиштето во коешто одел, па поради тоа не сакал да посетува часови.

Работите оделе дотаму, што некои деца му доаѓале дома и му се качувале на прозорецот од собата, сакајќи да му наштетат.

Лука Модриќ

Еден од најдобрите хрватски но и светски фудбалери, Лука Модриќ се соочил со булинг во 2003/2004 година и тоа од страна на други фудбалери.

Тој во едно интервју изјавил дека не само што трпел навреди од бројни фудбалери, кои му кажувале сè и сешто на теренот, туку и дека ја користеле секоја ситуација додека траел натпреварот за да го удираат физички по телото, нешто што не е премногу карактеристично за фудбалот, па често си одел дома со огромни модрици.

Александра Пријовиќ

Српската пејачка денес е меѓу најпопуларните во регионот, обожавана од публиката од „Вардар до Триглав“.

Но, тоа не било отсекогаш така. Во времето кога одела на училиште, Александра често била понижувана и исмевана, а децата не само што ја навредувале неа, туку ѝ кажувале погрдни зборови и за мајка ѝ.

Во едно интервју, Пријовиќ истакнала дека ова било многу болно искуство и дека не посакува ниедно дете да минува низ истата голгота како што поминала таа.

Нивес Целзиус

Хрватската пејачка, актерка и писателка, Нивес Целзиус се чувствувала помалку вредна од другите деца кога одела во основно училиште, бидејќи нејзината самохрана мајка била сиромашна и не можела да си приушти да ѝ купува брендирани патики и облека.

Поради ова, Нивес била на „црна листа“ меѓу нејзините врсници.

Таа во една прилика призна дека кога мајка ѝ конечно собрала пари за скапи патики, за децата тие не биле доволно добри, и тоа им бил повод за повторно да ја исмеат.

А. Ј. | Црнобело