Кучето-херој од пожарот во Расадник се врати дома и уште 4 позитивни вести од Македонија кои нè израдуваа минатата недела

Црни, кучето-херој од Расадник си отиде дома

Црни, кучето коешто го бранеше својот дом во пожарот во Расадник пред околу три недели, и кое се здоби со изгореници, веднаш по пожарот беше однесено на лекување во „Лајка“.

Од здружението за заштита на правата на животните, сега велат дека Црни е добар и дека конечно се врати дома.

„По 16 дена лекување во Лајка, херојот на Расадникот си се врати на локацијата каде што го чекаа брат му, куќичките и оние кои 10 години се грижат за него.

Ни беше огромна чест да се грижиме за тебе Црни и ти посакуваме долг и среќен живот покрај оние што те сакаат.

Им благодариме на сите оние кои имаа удел во лекувањето на Црни, вашата поддршка беше бесценета“, напишаа од Лајка на Фејсбук и објавија фотографија дека го испратиле Црни дома со торта.

5 ученици ќе ја претставуваат Македонија на светски натпревар по роботика

Од Македонија за Атина отпатува тим од 5 ученици и нивните ментори, а ќе учествуваат на светскиот натпревар по роботика First Global Challenge, кој ќе се одржи од 26 до 29 септември.

Темата на натпреварот е „Хранење на иднината“.

Нашиот тим го сочинуваат Димитриј Митковски, Елена Трпковска и Давид Маневски од средното училиште „Георги Димитров“, Тимотеј Николовски од средното училиште „Михајло Пупин“ и Марко Јанкуловски од средното училиште „Јахја Кемал“.

Нивни ментори се Јаков Спировски и Ален Куљеван.

Театарот за деца и младинци освои три награди на Интернационален фестивал за куклен театар во Загреб

Театарот за деца и младинци (ТДМ) од Скопје освои три награди со претставата „Роња, ќерката на ограбувачот“ на 57. Интернационален фестивал за куклен театар во Загреб, што се одржа од 13 до 19 септември.

Официјалното жири, одлучи да додели награда на актерката Матеа Јанковска за актерско остварување за улогата на Роња, на комплетната актерска екипа за колективната анимација на кукли и за сценографијата за Олга Зјебинска.

Претставата досега има освоено награди на фестивали во Подгорица, Котор, Нови Сад, Крагуевац, како и на 57. МТФ „Војдан Чернодрински“ во Прилеп.

Претставата е работена според романот од Астрид Линдгрен, а во режија и драматизација на Јакуб Максимов од Чешка.

Доколку сакате да споделите некоја убава и позитивна приказна од вашето секојдневие, која ви се случила вам или на која сте биле сведок, а со која ќе покажеме дека животот е прекрасен, пишете ни на Оваа е-адреса е заштитена од спамботови. Треба да ви е овозможено JavaScript за да ја видите. 

А. Ј. | Црнобело