Маја од Скопје: „Во еден миг си благодарна на Бога за бебето во прегратка, во друг паничиш што мора итно на операција“

Детали

четврток, 12 септември 2024

„Се прашував како ќе издржам јас сама сè, како ќе успеам да останам силна кога моето бебе ќе го оперираат, како ќе ја гледам како плаче од болки...“, споделува Маја Ристовска од Скопје за најтешките мигови од животот и испраќа силна порака за храброста на мајката.

Маја Ристовска од Скопје е мајка на Петра, малото бебе-херој, чија приказна веќе ја споделивме на CRNOBELO.com.

Петра е родена во 30-тата недела, таа морала да се бори со клиничка сепса, крвавење на мозочето, хидроцефалус предизвикан од крвавењето, а потоа морала да има и операција за да ѝ се вгради шант, што ќе помогне да се извади вишокот вода од мозочето.

Системот за шант се состои од катетер кој се вметнува во коморите на мозокот и вентил кој го регулира протокот на цереброспиналната течност.

Нејзината мајка постојано јавно говори на оваа тема и сега повторно се огласи.

Таа вели дека септември е месецот за поткревање на свеста за хидроцефалус и целта ѝ е што повеќе луѓе да дознаат за оваа состојба.

Инаку, хидроцефалус е проширување на мозочните комори или шуплини со вишок цереброспинална течност. 

Нејзината објава гласи:

„Во еден миг се радуваш и си бескрајно благодарна на Бога што конечно си го земаш бебето во прегратка, во друг миг слушаш ‘Ова е хидроцефалус, сигурно е тоа, сите 4 комори се полни со вода, мора итно операција’ и тука цел свет ти се руши.

Се прашував како ќе издржам јас сама сè, како ќе успеам да останам силна кога моето бебе ќе го оперираат, како ќе ја гледам како плаче од болки и сите тие прашања имаа само еден одговор дека морам и дека можам и дека ќе успеам.

Не успеав баш да останам смирена, тие час и половина мислам дека ми траеја еден цел век.

Кога конечно заврши операцијата ме однесоа во собата за будење, а само таа беше единствено бебе таму, сите беа околу нејзе, сите ја чуваа, беше во сигурни раце.

Застанав пред креветот и почнав да ја галам, ја будев и се разбуди. Тие очиња кога ме погледнаа како да ме чекаа само мене да ме видат и реков ‘Мама е тука Петра, сега сè ќе биде во ред, здрава си, најлошото помина'... Kако да знаеше што ѝ зборувам само ме стисна со рачето и заспа.

Септември е исто така и месец на хидроцефалус, скоро никој не е запознаен со оваа дијагноза, а е доста сериозна и со сериозни последици доколку не се реагира на време.

Продолжува на следната страница...