Родени скоро 4.000 штркчиња и уште 3 позитивни вести од Македонија кои нè израдуваа минатата недела

Детали

вторник, 10 септември 2024

Македонски филм освои две награди на престижен фестивал во Мексико - ајде да читаме позитивни вести!

Во време на многу црна хроника и неубави вести, да се расположиме со неколку позитивни и убави информации кои се случија минатата недела:

„Проект среќа“ обезбеди донации за 250 ученичиња

Здружението „Проект среќа“ на пејачката Кристина Арнаудова, обезбеди донации за 250 дечиња кои на 2 септември тргнаа на училиште.

Таа на својот сподели неколку фотографии и се заблагодари на компаниите кои со своите донации помогнале дечињата да добијат училишни ранци и прибор.

„250 дечиња отидоа среќни на училиште благодарение на овој проект. Среќна ви школска година, и благодариме на оние кои ги отворија своите срца“ - пишува, меѓу другото, Кристина.

Нашиот филм „М“ освои две награди во Мексико

Македонскиот филм „М“ на режисерот Вардан Тозија, во продукција на „Фокус покус“, освои две престижни награди на интернационалниот филмски фестивал „Макабро“ кој се одржува во Мексико Сити, Мексико.

Тозија ја доби статуетката за Најдобра режија во официјалната селекција, а филмот ги освои и срцата на публиката и го доби признанието Награда на публиката.

„Макабро“ е најстариот жанровски фестивал во Мексико, и вториот најстар фестивал од овој тип во Латинска Америка.

Фестивалот низ годините се етаблира како културен промотор и постојан магнет за младата публика пред која се презентираат филмски остварувања од доменот на фантастиката, хоророт, трилерот.

Нови 3.934 штркчиња во Македонија

Кај нас заврши пописот на штркови, кој, на национално ниво, го спроведе Македонското еколошко друштво.

Овој попис се прави на секои 10 години, а во нашата земја првпат се спроведе во 2014 година.

При истражувањето евидентирани се вкупно 1.765 гнезда на штркови (1.388 активни гнезда и 389 неактивни - односно гнезда во кои не се извеле млади, биле гнезда за спиење на штрковите или имало само една возрасна птица).

Вкупниот број на изведени штркчиња оваа година е 3.934.

Со помош на проектот „Куќа на среќата“ уште едно македонско семејство беше испратено на летен одмор, од кој се вратија преблагодарни

„Благодарност до сите кои ни помогнавте едно семејството да може да го испратиме на одмор на море. Среќата на едно семејство не можеме да ви ја опишеме со зборови, но за тоа можеме да ја споделиме пораката која ни ја пишаа“ – гласи објавата во Фејсбук групата.

А. Ј. | Црнобело