Славчо Попоски, метеоролог: „Топлотниот бран ќе се задржи уште барем 10 дена, викендов можно кратко невреме“

Детали

вторник, 30 јули 2024

„Температурите во Македонија ќе бидат многу високи. Исклучок ќе биде викендот, кога ќе има услови за локално краткотрајно невреме“, вели Славчо Попоски за претстојната недела.

Топлотниот бран што нè измачува веќе цел месец ќе треба да го трпиме уште некој период.

Иако во наредните денови е можна појава на краткотраен дожд, сепак ќе доминираат високи температури, на некои места и до 40 степени Целзиусови.

Во продолжение, прогнозата на Славчо Попоски:

„Се очекуваше уште еден голем топол африкански бран, и тоа се остварува.

Во следните најмалку 10 дена, продолжува топлотниот африкански бран во Македонија со многу високи температури на воздухот.

Времето ќе биде стабилно, суво и сончево, со појава на мала до умерена локална облачност.

Исклучок ќе биде викендот, односно 3 и 4 август, кога во попладневните часови ќе има локален развој на нестабилност, проследена со пороен дожд, грмежи, засилен ветер и услови за појава на локално краткотрајно невреме.

Што се однесува до температурите, тие насекаде ќе надминуваат 30 степени Целзиусови.

Во најтоплите централни и југоисточни предели, како и во Скопската Котлина, температурите ќе се искачуваат до околу 40 степени Целзиусови, но со тоа што истите повремено можно е и да надминат 40 степени Целзиусови.

УВ индексот и понатаму ќе има многу висока вредност и ќе биде со коефициент некаде помеѓу 8 и 9“.

Спирова С. | Црнобело

фото: Фејсбук, freepik.com