Се слави празникот Вознесение Христово – Спасовден: Што не треба да се прави денес?

Детали

четврток, 13 јуни 2024

40 дена по Велигден и 10 дена пред Духовден се слави празникот Вознесение Христово, Спасовден. Денес не се работи ништо, а се верува дека празникот може да донесе спас и заштита од болести и немаштија. Напорната работа на денешен ден може да донесе болест и удар од гром.

Денес (13.06) православните христијани го слават празникот Вознесение Христово, кој кај народот е познат и како Спасовден. Именден слават Спасе, Спаско, Спасија, Спаска, Спасена …

Празникот Вознесение Христово, Спасовден секогаш се слави 40 дена по Велигден и секоја година го менува датумот, кога спасителот Исус се вознел на небото.

Интересно е што овој празник секогаш се паѓа во четврток, а според народните верувања, во некои делови од нашата држава, денес повторно треба да се бојадисаат црвени јајца.

Исто така, овој празник секогаш е 10 дена пред Духовден.

Според Новиот Завет се верува дека Исус Христос, по воскреснувањето, 40 дена им се јавувал на своите ученици и им проповедал да не се оддалечуваат од Ерусалим, туку да го чекаат доаѓањето на Светиот Дух.

На 40-тиот ден по воскреснувањето, Исус ги повикал своите ученици во Витанија, каде ги благословил со своите раце и се вознесол на небото.

Христијанските верници овој празник го слават со одење во црква, се слават слави и имендени.

Со оглед на тоа што овој празник е одбележан со црвени букви во православните календари, се верува дека на овој ден не треба да се извршуваат тешки задачи, туку денот да се посвети на молитва и на семејството.

Се верува дека славата на овој ден може да го заштити семејството од болести или немаштија, а во минатото во некои краеви се верувало дека ако се работи на денешен ден тоа може да донесе удар од гром и лоша болест во семејството.

Според старите обичаи, на денешен ден се плетеле крстови од гранчиња леска, кои потоа се оставале пред куќата, во дворовите, нивите и ливадите за заштита, радост и благосостојба.

Овие мали крстови се чувале во текот на целата година, а наредната година се плетеле нови.

Во чест на овој празник во Македонија има повеќе манастири и цркви, кои го одбележуваат денешниот празник.

Б. С. Б. | Црнобело