Тројца доктори со златно срце се Мажи на годината 2023

Детали

четврток, 21 декември 2023

„На почетокот на годината добивме Златна Бубамара и таа награда му ја посветивме на првиот пациент на кој му направивме трансплантација на црн дроб. Оваа награда е за сите тројца кои досега ги трансплантиравме“, рече Д-р Светозар Антовиќ откако тој и неговиот тим беа прогласени за Мажи на годината 2023.

Вчеравечер (20.12) во хотелот Хилтон шести пат беа доделени наградите за Маж на годината. На гала вечерта, пред многуте гости, најпрестижната награда ја доби не еден, туку тројца мажи - тимот доктори од Клиниката за дигестивна хирургија - проф. Д-р. Светозар Антовиќ, и неговите колеги Љубомир Огненовиќ и Ќемал Рушити, кои направија три трансплантации на црн дроб оваа година.

По силните аплаузи и овации во салата, тие ја примија наградата, а ја посветија на своите пациенти.

„Ова е тим на годината. Не знам дали знаете, ние на почетокот на годината добивме и Златна Бубамара на популарноста. Таа награда му ја посветивме на првиот пациент на кој му направивме трансплантација на црн дроб.

Оваа награда е посветена на сите тројца кои досега ги трансплантиравме и за кои се надевам дека се во добро здравје,“ рече Светозар Антовиќ по врачувањето на наградата.

Награда доби и Сашко Коцев за најголем придонес во културата, а наградата си ја врачи самиот на себе.

За маж од областа во спортот награда доби капитенот на одбојкарската репрезентација на Македонија, Никола Ѓорѓиев, маж со најдобар стил во 2023 е оперскиот пејач Иван Наумовски, а наградата за Маж на годината според социјалните мрежи е Божидар Божиновски.

За музичкиот дел беше задолжен токму Наумовски, кој испеа неколку песни од Френк Синатра и Елвис Присли, но и пејачките Полина Тасева и Калина Велковска.

А. Ј. | Црнобело / фото: Е. П.