Славчо Попоски, метеоролог: „Викендов очекувајте послаби врнежи од снег и температури до -10 степени“

Детали

среда, 13 декември 2023

„Веќе од четврток нè очекува голема промена на времето и нов голем бран на врнежи од запад. За време на викендот, во градовите можно е да има послаби локални врнежи од снег“, открива метеорологот Славчо Попоски.

Сите можеме да се согласиме дека досега, есента е релативно топла.

Веќе е декември, а сè уште не сме почувствувале вистински студ.

Снег, пак, речиси и да нема.

Сепак, метеорологот Славчо Попоски прогнозира дека треба да се подготвиме за постудено време – утрински температури кои ќе се спуштат и до -10 степени, ќе има повеќе врнежи од дожд, но и снег.

Целата прогноза на Славчо Попоски за следниот период:

„По краткотрајното затоплување кое ни пристигна, имаме официјални информации дека веќе од четврток попладне и навечер кај нас доаѓа нова голема промена на времето и нов голем бран врнежи од запад, поточно од Атлантикот.

Најпрвин врнежите насекаде ќе бидат од дожд, потоа во четврток навечер и во текот на ноќта кон петок, поради продор на многу постуден воздух од север, на планините и на повисоките места врнежите од дожд брзо ќе преминуваат во врнежи од снег (НАПОМЕНА: Снежната граница ќе се спушти под 1.000 метри надморска височина).

На планините и на скијачките центри ќе се формира позначителна снежна покривка (од 20 до 30 сантиметри, понекаде и до 40 сантиметри, особено на високите планини).

За време на викендот, и тоа поради понатамошно спуштање на студен воздух од север, послаби локални врнежи од снег ќе има и во градовите. Сето ова ќе биде проследено со засилен ветер од северен правец.

Температурите позначително ќе се намалат, па така наутро истите насекаде ќе се спуштаат под нулата, понекаде тие ќе се спуштат и до -10 степени, а на високите планини и под -10 степени.

Максималните дневни температури за време на викендот исто така ќе бидат ниски и на многу места тие ќе се искачат само за некој степен над нулата, а понекаде ќе останат и негативни.

Во Скопје, со овој бран, врнежи од снег ќе има на околните планини, а провејување на снег можно е и во повисоките предели од котлината. Не се исклучува можноста за време на викендот по некоја снегулка локално да провее и во котлината. Сето ова ќе биде проследено со засилен северен ветер.

НАПОМЕНА: Поради очекуваните интензивни снежни врнежи и ниските температури кои ќе создаваат појава на голомразица, на возачите им препорачуваме крајно внимателно да управуваат со своите возила, особено ако се движат кон планинските превои и скијачките центри“.

Спирова С. | Црнобело

фото: Фејсбук, depositphotos.com