Златко Јовановски креираше за најголемата мексиканска ѕвезда Талија: „Како дете ја гледав Росалинда, денес контактирам со неа“
- Детали
- четврток, 03 август 2023
„Креацијата на Талија е направена специјално за неа. Нејзиниот стилист дошол до моите креации и до моето име, па тој ме контактираше за соработка. Ми кажа дека креацијата мора да биде инспирирана од парчиња што таа веќе ги носела, а јас им испратив три скици“ вели дизајнерот Златко Јовановски за CRNOBELO.com.
Македонскиот дизајнер Златко Јовановски, познат како ЈЗЈ, креираше корсет за најпознатата мексиканска актерка и пејачка, Талија.
Популарната Мексиканка, која се прослави со улогата на Росалинда во истоимената серија, го облече корсетот во розова боја, со впечатлива круна и крст, па фотките ги објави на својот Инстаграм.
Ни Златко не ја криеше возбудата од оваа неверојатна соработка. Тој вели дека инспирацијата за дизајнот го пронашол во фустан што таа го носела во 1992 година.
За CRNOBELO.com македонскиот дизајнер раскажа како стапил во контакт со Талија и детали за креацијата:
„На моја огромна чест и задоволство, Талија носи моја креација направена специјално за неа. Нејзиниот стилист дошол до моите креации и до моето име, па ме контактираше за соработка.
Ми кажа дека креацијата мора да биде инспирирана од парчињата што Талија ги носела некогаш одамна.
Јас пратив три опции, три скици, а Талија и нејзиниот стилист ја избраа оваа.
Овој корсет е направен од кадифе во розова боја и надолу продолжува во форма на жартиери (подвезици).
Амблемите се рачно направени, везени со разновидни монисти и камења.
За крај би додал, верувајте во чуда. Бидејќи за мене е многу (позитивно) чудно што како дете ја гледав шпанската серија ‘Росалинда’ и замислував како живеат тие актери, а денес со Росалинда, главниот лик на серијата, односно со Талија, сум во контакт.
Сè е возможно ако вистински се сака и напорно се работи за истото“.
Ова не е прва соработка на Златко со светска ѕвезда. Тој ја облече пејачката Ава Макс за насловната страница на списанието Her Magazine, негова креација носеше пејачката Мани Лонг, тој дизајнираше парчиња кои се најдоа во модни едиторијали на списанијата Cosmopolitan и Glamor и други.
Златко соработува и со естрадата од регионот, па изминативе години негови креации носеа Јелена Карлеуша, Цеца, Драгана Мирковиќ, Николија, Сања Вучиќ од Hurricane и многу други.
Прочитајте и Златко Јовановски, наш моден дизајнер: „Ме нервираат Македонките кога глумат лажно скромни, ако сакаш да светиш – свети“
А. Ј. | Црнобело
Би можело да ве интересира:
Препорачуваме
Најчитани неделава
