Филмско запросување на Македонка на Малдиви со рози и романтични фенери: „Ја затворија плажата за нас“

Детали

петок, 12 мај 2023

„Таа не знаеше воопшто ништо, ни малку не помисли на тоа. Момците од ресортот цел ден макотрпно работеа на високите температури и ја блокираа целата плажа за нас. И токму тогаш со солзи радосници во очите го добив најубавото 'да',“ - раскажа Бобан Павлов од Велес за CRNOBELO.com.

Велешанецот Бобан Павлов (26) ја побара за сопруга својата девојка Мартина Анѓелова (24) на зајдисонце на Малдиви.

Тој организираше запросување на плажа со ливчиња од рози, шампањско и романтични фенери, а за CRNOBELO.com вели дека од ресортот во кој биле сместени, ја затвориле целата плажа само за нив за да го имаат најубавиот момент во нивниот живот.

Бобан запросувањето го планирал сам, а со батлерот кој бил задолжен за него и Мартина, успеале да ја излажат дека некој друг подготвува романтично запросување на тоа место. 

Бобан за CRNOBELO.com ја раскажа нивната љубовна приказна, која трае 5 години.

„Јас и Мартина сме од Велес. Од ист град родум, но нашето запознавање се случи во Германија каде што моментално и живееме и работиме.

По 5 убави години поминати заедно низ љубов и разно-разни патувања низ светот, одлучив овој прекрасен чин да го направам на Малдиви.

Таа не знаеше воопшто ништо, ни малку не помисли на тоа. Јас резервирав одмор и со долга предвремена организација во ресортот, стигнавме до овој убав момент.

На денот кога стигнавме ни одредија батлер кој во текот на целиот одмор беше задолжен за нас. Тој со своето искуство ми предложи неколку разни идеи, место и време на настанот.

Во неизвесност бевме дали временските услови ќе ни излезат во пресрет, но кога заклучивме дека денот е прекрасен, момците почнаа со работа. Тие макотрпно работеа на високите температури и ја блокираа целата плажа за нас. 

Неколкупати морав да ги посетам за да видам дали се одвива сè според планот, па тогаш ѝ кажав на мојата девојка дека ќе има специјална свечена вечера која ја организира хотелот и да се спреми.

Кога прошетавме низ плажата таа го здогледа местото и ме праша што се случува таму, рече дека е прекрасно е и дали може да видиме, а тоа беше и мојот план. Кога стигнавме го затекнавме нашиот батлер кој ѝ кажа дека ова е резервирано и организирано од друг пар, но дека може да се сликаме.

Кога почнавме со фотосесијата, буквите беа покриени, а прстенот се наоѓаше во срцето пред буквите. Кога стигнавме таму, јас клекнав и ја запросив.

Потоа следуваше фотосесија што ја направи фотограф од островот, а дојдоа и туристи од цел свет што беа во ресортот да видат што е и да се фотографираат и тие. Сè се случи некако како во филм но морам да признаам беше неверојатно. 

Потоа имавме преубав одмор од 12 дена којшто беше полн со тропски изненадувања, нуркање со ајкули и различни видови риби, посета на други острови и разноразни активности“, рече Бобан.

Повеќе фотографии од запросувањето:

©CRNOBELO.com Забрането преземање и копирање. Крадењето на авторски текстови е казниво со закон.

А. Ј. | Црнобело