На 65 години го доби третото дете, порасна во Скопје - Факти за легендарниот Аки Рахимовски
- Детали
- понеделник, 24 јануари 2022
Пред 2 години го доби третото дете, ќерката Антонија од врската со 27-години помладата партнерка, Барбара. Често доаѓаше во Скопје, каде пораснал и каде сè уште живее неговата мајка - факти за легендарниот музичар Аки Рахимовски чие срце престана да чука на 22 јануари.
фото: Facebook - Parni valjak
Балканската јавност остана во неверување, откако во саботата (22.01.2022) во 66-тата година од животот ненадејно почина фронтменот на групата Parni valjak, Аки Рахимовски.
Голем број колеги од Македонија и регионот со свои објави на социјалните мрежи се простија од музичката легенда.
https://www.instagram.com/p/CZCYICgo1k0/?utm_source=ig_web_copy_link
Александар Аки Рахимовски имаше плодна музичка кариера и како фронтмен на групата Parni valjak зад себе остави голем број хитови, а Скопје и Македонија беа местата каде што тој постојано се враќаше и гордо споделуваше спомени за својот живот во нашиот главен град.
Со својата неверојатна харизма и талентот за пеење ја освојуваше балканската публика децении наназад, а неговите стихови се пееја во минатото и ќе се пеат во иднина.
Во продолжение проследете неколку интересни факти што можеби не сте ги знаеле за Аки Рахимовски:
Аки е роден во Ниш на 5-ти мај 1955-та година, но набрзо со семејството се преселиле во Скопје, каде израснал. Неговата мајка сè уште живее во Македонија.
Љубовта кон музиката Аки ја наследил од неговиот татко, кој бил професор по музичко образование, а на седум години почнал да оди во музичко училиште, отсек клавир и пеење.
Неговиот прв менаџер Владимир Михалjек, за хрватските медиуми откри дека за првпат имал прилика да го слушне Аки како пее сосема случајно во бар во Скопје, каде тој пеел и свирел на клавир. По ова менаџерот го поканил да дојде на фестивалот Boom во Љубљана.
https://www.instagram.com/p/3i22oIykht/?utm_source=ig_web_copy_link
На 19-годишна возраст Аки се преселил во Загреб каде настапувал со разни бендови: Vakuum, Krvna braća и Tor. Во 1975-тата година го формирал првиот состав на легендарните Pаrni valjak, а следната, 1976-та година бендот ќе го објави својот прв студиски албум насловен: Dođite na show.
Се знае дека тој бил во брак двапати, а со втората сопруга Ингрид биле заедно повеќе децении. Со првата сопруга Аки го добил синот Кристијан, кој исто така е музичар, а од вториот брак со Ингрид ја добил ќерката Едина. Од синот Кристијан, Аки доби и два внука: Давид и Филип.
Велеше дека сака да го чува приватниот живот подалеку од очите на јавноста, а за него најважно беше семејството. Тој во една прилика за Blic изјави:
„Приватниот живот треба да остане приватен. Мојата сопруга не бараше да се експонира заедно со мене и навистина секојпат кога ќе се појавиме заедно на некој настан, фотографите знаат дека таа не сака да се фотографира и не нè фотографираат.
Честопати се случувало во весниците да излезе слика со мене и со некоја друга жена, а таа да ми каже: ’Од кога јас станав русокоса?‘ Парите не се важни. Најважно е семејството. Кога ќе ги земам своите внуци, сфаќам што е најважно во светот. Не се парите, тоа е семејството“.
Иако многумина го поврзуваат со големиот број љубовни песни на Parni valjak, Аки во минатото рече дека стиховите не се негово дело, туку на Хусеин Хасанефендиќ – Хус, а дека тој само ги пее:
„Тоа е сè масло на Хус, тој ги пишува песните, јас само ги пеам. Морате него да го прашате што мисли кога ги пишува.“
Аки во 2018-тата година имаше послаб мозочен удар, но брзо закрепна, па во изјава за медиумите рече дека се чувствува добро и дека воопшто не било толку страшно како што читал во весниците.
„Важно е дека закрепнувањето оди според планот, дека јас добро се држам и дека сите заедно веруваме дека на крај сè ќе биде во ред“.
Во февруари 2020-тата година на 65-годишна возраст Аки го доби третото дете - ќерката Антонија, од врската со Словенката Барбара Весел која е 27 години помлада од него и за која се знае дека работи како медицински техничар.
Се знае дека во последните години од животот Аки заедно со Барбара престојуваа често во Словенија каде се грижеа за нивната речиси 2-годишна ќерка, а тој често доаѓаше и во Скопје за да ја посети болната мајка.
Б. С. Б. | Црнобело
Би можело да ве интересира:
Препорачуваме
Најчитани неделава
