Здравко Чолиќ, Ацо Пејовиќ: Браво! Српските ѕвезди преку филмот „Тома“ сплотени со една хумана цел

Детали

вторник, 21 декември 2021

Филмот „Тома“ не само што нè потсети на еден легендарен лик и дело, туку сега со својата магија допира и до животите на другите. Како Србија се сплоти во акцијата „За Лука повторно да создава“?

Кога се сака се може, па така периодов српските познати личности се сплотени во мисијата да соберат финансиски средства за помош на еден болен дечко, за помош на младиот Лука.

На продажба се парчиња облека од филмовите на Драган Бјелогрлиќ, а огромен одзив има за парчињата од филмот „Тома“. Во организацијата е вклучен и Жељко Јоксимовиќ.

Одзивот на акцијата е неверојатен.

Здравко Чолиќ веднаш си купи едно од сакоата на Тома, истото го стори и Ацо Пејовиќ, кој всушност и ги изведува песните на Тома Здравковиќ во филмот.

На хуманата мисија се приклучи и Никола Роквиќ кој го купи фустанот на Силвана Арменулиќ, потоа фудбалскиот тренер Драган Стојковиќ Пикси лицитираше за гулабот Радоје (од Монтевидео), како и низа други српски спортисти.

На продажба беа и предмети од „Монтевидео“ и серијата „Сенке над Балканом“.

Хуманитарната акција е со наслов „За Лука повторно да создава“ и средствата се за лекување на писателот, поет и драматург Лука Курјачки.

Младиот драматург и сценарист има малиген тумор на мозокот и потребно е лекување во странство. Тој веќе имал една операција во 2015, па втора во 2018, но за жал туморот се вратил по третпат и спасот се гледа во една иновативна техника во Јапонија.

Браво за акцијата и сплотеноста и браво за познатите личности!

С. С. | Црнобело