Бора Чорба почина на 71-годишна возраст во болница во Љубљана

Детали

среда, 04 септември 2024

По повеќедневна борба со здравјето, во болница во Љубљана, денес почина Бора Чорба, вокалистот на рок групата „Рибља чорба“.

Борисав Бора Ѓорѓевиќ, кој е познат како Бора Чорба, ја загуби битката со животот.

На 4 септември 2024, српските медиуми известија дека тој почина.

Точната причина за смртта уште не е позната, но во последниот период повеќе настапи му беа откажани заради лошо здравје, а беше примен во болница во Љубљана заради воспаление на белите дробови, каде бил на кислородна поддршка, а потоа и на респиратор. 

„Бора е уште на респиратор, интубиран, еве веќе 8 дена, во Клиничкиот болнички центар во Љубљана. На интензивна нега е, лекарите даваат сè од себе“ – изјавил менаџерот на Бора за MONDO.rs пред неколку дена.

Легендарниот музичар беше вокалист на рок групата „Рибља чорба“ уште од основањето во 1978 година.

Тој веќе подолг период имаше проблеми со здравјето, а во изминатиот период откри и дека во стиховите на понова песна, тој ја опишувал својата моментална состојба:

„Не ми се допаѓа тоа што стареам. Станувам стара мрза, не живеам, само животарам и страдам од разни болештини“.

Бора умешно го криеше приватниот живот од јавноста, но зад себе, ги остави својата сопруга Дубравка Милаковиќ, синoт Борис, а со нив наводно живеела и ќерката на неговата прва сопруга Драгана.

М. М. | Црнобело