Затворање на рестораните, максимум 3-ца гости на ден: Македонец открива кои се новите мерки во Холандија

Детали

среда, 14 октомври 2020

Од начин на работа на локалите до носење маски, какви мерки преземаат холандските власти периодов? Македонец кој живее и работи таму повеќе од 2 децении ни пренесува каква е ситуацијата. „Од вечер во 8 ни ги затвораат на 4 недели рестораните и баровите...“, започнува тој.

Игор Трајковски, кој по професија е софтверски инженер, живее и работи во Холандија од 1997 година.

Тој открива каква е моменталната ситуација со пандемијата таму:

Од вечер во 8 ни ги затвораат на 4 недели рестораните и баровите (и „кофишоповите” во кои никој не купува кафе). Ќе може само да си нарачаш и земеш храна за дома. А и продажба на алкохол нема да има од 8 вечер до сабајле. Холандија воведе поригорозни мерки, иако - искрено - очекувавме дека ќе бидат подрастични.

Маски ќе мора да носиме во сите затворени јавни простори (со акцент на „ќе“, прво мора да се направат некои законски измени), но досегашната сериозна препорака за носење маски повеќето веќе ја почитуваат, во самопослуги и други продавници скоро секој носи маска иако не е обврска, а некои објекти и сами си донесоа одлуки за задолжително носење маски. Гости дома - најмногу тројца на ден (не тројца по тројца на смени).

Нема да има ни аматерски групни спортови, но професионалните си продолжуваат (без публика, така е од претходно). На отворено маските остануваат прашање на личен избор, но групирања се дозволени повторно само во друштва од четворица со задолжителна дистанца од метар и пол.

Сепак, во отворените аутлет шопинг центри маски се задолжителни веќе подолго време и надвор од продавниците - во саботата се загнавме на пат до еден по скоро година дена пауза (се погоди убаво време). На влез имаше контрола дали имаш маска и ако немаш - можеше/мораше веднаш да си купиш инаку нема влез. Цел ден го минавме со маска, освен кога ќе седнеш да јадеш и пиеш во ресторан или на клупа. Ништо не ни фалеше, останавме живи незадушени. 

Сѐ на сѐ, не се потресовме нешто посебно, живот тече даље. За угостителите ќе биде тро’ потешко... (Во меѓувреме, маските ни ги намалија у комшилак, сега се 5 евра за 50.)

С. С. | Црнобело