Три сестри од Скопје продаваат облека oд втора рака: „Спонтано ни дојде идејата за свој бизнис“
- Детали
- петок, 13 септември 2024
„Во Македонија, трендот за купување облека од втора рака расте сè повеќе. Секое парче облека кое го продаваме е со голема грижа одржувано - тоа е облека која е носена, меѓутоа е во одлична форма...“, споделуваат трите сестри кои стојат зад профилот „Your second hand corner“.
Зад Инстаграм профилот „Your second hand corner“ стојат три сестри од Скопје (две близначки на возраст од 21 година и уште една постара сестра на возраст од 28 години), страствени љубители на модата и шопингот.
Велат дека профилот се родил од потребата да ослободат простор во нивните плакари и да им дадат нов живот на парчињата облека кои ги имаат.
Така создале место преку кое секое парче облека може повторно да заживее и да најде нов дом, па така нивната приказна веќе трае нешто подолго од три години.
За CRNOBELO.com споделуваат детали за својот мал бизнис:
Дали се средува облеката претходно? Колку е сочувана?
Секое парче облека кое го објавуваме на профилот е внимателно избрано и со голема грижа одржувано. Тоа е облека која е носена, меѓутоа е во одлична форма и може да се носи со години потоа.
Веруваме дека малите бизниси многу повеќе обрнуваме внимание на квалитетот и чистотата на парчињата облека, отколку што тоа го прават големите брендови.
Облеката која ја продаваме е претходно уредно средена и спремна да премине во рацете на купувачот.
Колку во светот е тренд да се купува на овој начин? Купуваат ли Македонците облека од втора рака?
Во последните години, купувањето облека од втора рака значително е зголемено ширум светот.
Интересно е тоа што, глобалниот пазар за користена облека расте 11 пати побрзо од традиционалниот малопродажен пазар на облека.
Среќни сме што сè поголем број луѓе ја избираат одржливоста преку оваа еко-свесна алтернатива.
Во Македонија, трендот за купување облека од втора рака расте сè повеќе, особено поради економската пристапност и зголемената свест за еколошки прашања.
Среќни сме што секојдневно добиваме поддршка и комуницираме со сè повеќе луѓе кои препознаваат вредност во ваквиот начин на купување облека и горди сме што нашиот бренд станува сè попрепознатлив меѓу сограѓаните.
Кои се придобивките?
Купувањето облека од втора рака е навистина добитна ситуација. Со изборот на користена облека, директно се придонесува за еколошка одржливост, намалувајќи го текстилниот отпад и влијанието на модната индустрија врз животната средина.
Воедно, економски е многу поповолно, нудејќи квалитетни парчиња по далеку пониски цени.
И на крај, ова е вистински пат кон уникатен стил – ретки, оригинални парчиња кои не може да се најдат во класичните продавници.
Продолжува на следната страница...
Би можело да ве интересира:
Препорачуваме
Најчитани неделава
