Јасмина Цветковска 9 години живее во Сиднеј: „Како инженер лесно најдов работа, но проблем се скапите кирии и станбените кредити“

Детали

четврток, 17 август 2023

„Дипломите од природните науки, машинските струки, архитектура, електро-инженерските струки, сите ИТ насоки, се признаени и може да се најде солидна работа по струка и да се заработува солидно. По улиците на Сиднеј незамисливо е да видите улични кучиња или мачки, ниту ѓубре… Но, најголем проблем се цените на недвижнините и кириите кои се плаќаат на неделно ниво и се движат од 700 до 1.000 долари“ - раскажува за CRNOBELO.com Јасмина Цветковска, инженер по биохемија, која 9 години живее во Сиднеј и работи во едeн од најпознатите Институти за кардиоваскуларни заболувања.

Јасмина Цветковска е дипломиран инженер по Биохемија, а во последните 9 години работи во еден од најпознатите институти за кардиоваскуларни заболувања во Австралија, којшто воедно е еден од најдобро рангираните во светов во таа област.

Таа по потекло е од Ресен, каде ги завршила основното и средното образование, а потоа се преселила во Скопје, каде дипломирала како еден од најдобрите студенти на Природно – Математичкиот Факултет, на катедрата за Биологија, Биохемиско – Физиолошка насока.

За CRNOBELO.com оваа успешна Македонка раскажува како со семејството пред 9 години одлучиле да ги спакуваат куферите и да си ја побараат среќата од другата страна на земјината топка, во Австралија, со кои предизвици се соочиле, но и ден-денес се соочуваат, и открива дали навистина во странство животот е полесен кога имаш стекнато квалитетно образование и универзитетска диплома.

Кои се предностите, а кои се лошите страни да се живее во Австралија и дали навистина таму сè e толку розово како што многумина се обидуваат да го опишат или постојат и други нијанси што треба да ги земете превид пред да почнете да размислувате да се преселите таму.

Интервјуто со Јасмина Цветковска за CRNOBELO.com:

Дипломиравте во Македонија, тука ја почнавте кариерата, можете ли да ни кажете кога одлучивте дека сакате да се преселите во Австралија?

Одлуката за заминувањето во странство, а особено во прекуокеанска земја, не беше воопшто лесна.

Но, за жал севкупната ситуација во Македонија нè натера да размислуваме и на таа опција. Мојата приказна не е воопшто поразлична од приказните на многумина млади интелектуалци кои ја напуштија и сè уште ја напуштаат земјата.

За жал, во нашата земја не се препознаваат капацитетите на младите луѓе кои сакаат да се остварат во своите кариери, а со тоа да дадат придонес во развојот на сопствената држава.

Затоа пак, во западните земји и тоа како го препознаваат квалитетот и им се дава шанса на сите луѓе, од сите меридијани на земјината топка без разлика на нивната национална, партиска или каква било друга припадност.

Единствен критериум за успех е личниот капацитет и желбата за напредок. Жалосно е што со губењето на интелектуалниот капацитет, ризикуваме да си ја изгубиме државата во вистинска смисла на зборот. Се надевам дека историјата ќе нè научи нешто.

Тешка ли беше одлуката да си заминете од Македонија и колку време траеше процесот за средување документи?

Како што напоменав во вашето претходно прашање, одлуката не беше лесна, но и останувањето во Македонија и тапкање во место не беше опција исто така.

Животот е премногу краток, секогаш треба да се стремиме да го извлечеме најдоброто од него, особено во нашите најпродуктивни години за нас лично, но и за нашите семејства.

Процедурата за добивање австралиска иселеничка виза не е лесна, напротив тоа е многу макотрпен, исцрпувачки, скап и неизвесен процес.

Ние си средивме сè сами, не користевме услуги од миграциски агенции. Австралиската веб-страница на Министерството за имиграција е премногу разбирлива, така што доколку имате солидни познавања од англискиот јазик, може да си ја средите процедурата сами и да заштедите пари.

Сопругот е електро-инженер, програмер по професија и тој беше носителот на визата. Процесот вклучува верификација на дипломата и работното искуство од Македонија, полагање IELTS со високи оценки и апликација за виза. Откако ќе добиете потврден одговор дека сте се квалификувале за апликација на визата, следат уплатите за визата и медицински прегледи.

Ние веднаш добивме Permanent residence visa (Виза за постојан престој), што беше огромна предност затоа што ни овозможи брза интеграција во системот.

Со сите други визи, патот е многу трнлив, скап и никогаш не се знае дали ќе успеете да добиете виза за постојан престој.

Ова го кажувам затоа што слушам за многу граѓани кои, за жал, беа изиграни од неодговорни миграциски агенти.

Треба многу да се истражува и да се биде многу внимателен при вакви одлуки.

Дали во Австралија веднаш ви ги признаа дипломите или беше потребно да се доквалификувате за да можете да работите на полето на вашата професија?

Македонската диплома ја нострифицирав во Министерството за образование на Австралија.

Да, нашата диплома од Биохемиско-физиолошката насока на ПМФ е признаена во Австралија затоа што имаме звање инженер.

Сепак, за да почнам да работам во научно-истражувачка област, требаше да волонтирам неколку месеци заради тоа што не поседував австралиско работно искуство.

Овде во Австралија најмногу го ценат практичното искуство, дипломата секогаш доаѓа во втор план.

Дали дипломата и високото образование гарантираат добра работа во Австралија?

Во принцип да, но сепак зависи од професијата.

Некои дипломи, особено оние од опшествените науки, поголемиот дел, не се признаени во Австралија, како и секаде во светот.

Дипломите од природните науки, машинските струки, архитектура, електро-инженерските струки, сите ИТ насоки, се признаени и може да се најде солидна работа по струка, да се напредува и да се заработува солидно.

Во моментов, како и кај нас, и тука имаат голема потреба за занаетчии, но проблемот е што за добивање на виза еден од критериумите е да се владее солидно англискиот јазик, што е голем проблем за многумина не само од Македонија, туку и од светот.

Продолжува на следната страница...