Пресолена супа, разводнет сос – како да гo „спасите“ јадењето кога ќе направите грешка?

Дури и на врвните готвачи им се случува да ја пресолат супата или да направат грешка додека готват, а не па на нас, кои сме само аматери во кујна.

Добрите вести се дека во повеќето случаи има начин како да ја поправите грешката и да го спасите јадењето.

Во продолжение погледнете како:

Пресолена супа

Ако ставите повеќе сол во супата, важно е да знаете дека никогаш не треба да ѝ додавате вода. Со ова можеби ќе ја регулирате солта, но сигурно ќе го уништите вкусот на супата.

Наместо тоа, можете да додадете булјон без сол.

Исто така, ако дозволува рецептот, можете да ставите ориз, зеленчук или тестенини како фиде.

Премногу зачинето јадење

Ако ставите премногу пипер во јадењето, постојат неколку трикови што ќе ви помогнат да го неутрализирате вкусот. Треба само да одредите што ќе одговара најмногу со рецептот што го приготвувате.

Додајте малку шеќер во јадењето, додека не се намали интензитетот на вкусот на пиперот.

Ако одговара со јадењето, додајте млечен продукт, како павлака за готвење. Или додајте оцет или лимонов сок.

Течно пире

Можете да го спасите и многу течното пире – едноставно, ставете го на тивок оган во тенџере што не загорува и почекајте да испари дел од течноста. Не заборавајте постојано да го мешате додека е на шпоретот.

Или, можете да додадете малку брашно. Во овој случај додавајте го брашното полека, со постојано мешање, сè додека не ја добиете посакуваната густина. 

Залепена пита

Ако питата ви се залепила на тавата, нема потреба да ја растурете.

Можете да го потопите долниот дел од тавата во топла вода – топлината ќе растопи дел од залепените состојки и полесно ќе ја извадите питата.

Или, превртете ја тавата наопаку врз чинија, а горниот дел завиткајте го со влажна, студена крпа.

Разводнета крем-супа

Крем супата треба да биде густа, но лесно е да погрешите и да ја направите премногу течна.

Во овој случај можете да додадете варен ориз или варен грав, леќа и слично, кои ќе ги изблендирате.

Разводнет сос

Во зависност од тоа каков сос правите, постојат два начини на кои можете да го згуснете.

Ако дозволува рецептот, во сосот додајте малку брашно и добро промешајте на тивок оган.

Ако не можете да додадете брашно, ставете го тенџерето со сос во тава за печење што ќе ја наполните со вода. Ставете го сосот во рерна на ниска температура и оставете го 10-тина минути. Откако ќе го извадите вкусете го, бидејќи можно е да испарат некои вкусови, а некои да станат посилни.

Спирова С. | Црнобело