5 видови храна која што е богата со електролити

Најголем дел од луѓето коишто вежбаат едноставно само пијат големи количини на вода после вежбањете.

Но, оние кои практикуваат потешки тренинзи, луѓето коишто тренираат за маратон или играат тенис по неколку часа на жешкото сонце знаат дека мора да се додадат и минерали во исхраната коишто ги исфрламе преку потта.

Секако дека електролитите ги има во сите стандардни спортски напитоци и енергетски плочки, но тие најчесто содржат и големо количество на калории и додатен шеќер.

Еден од подобрите начини да ги надоместите изгубените електролити потребни за да се постигне баланс на течностите во организмот и да им помогнете на мускулите и нервниот систем коишто се неопходни за врвни атлетски перформанси, е истите да ги внесете со помош на лажица и виљушка.

Храната содржи многу електролити, како и витамини и останати состојки кои го штитат здравјето. Еве кои од нив ви се неопходни за совршено здравје:

Натриум

Денес најчесто слушаме препораки да ја избегнуваме солта, но токму овој електролит го губиме во најголеми количини кога се потиме. Солта му помага на телото да ја задржи водата, а со тоа ве одржува хидрирани подолго време. Сепак, тоа не значи дека треба да изедете цело кесиче солени переци после напорно вежбање.

Лесно можете да замените 800 мг натриум изгубен во 2 литра пот за време на напорни едночасовни вежби со тоа што ќе каснете земичка со путер од кикиритки и ќе се напиете едно чоколадно млеко.

Исто така се препорачува и да се консумира некое посолено јадење, како супа, пред напорната сесија вежби со многу потење, за да може телото подобро да биде подготвено да задржува течности и да ја оджува хидратацијата во текот на целото времетраење на вежбањето.

Хлорид

Најчесто се наоѓа во соединение со натриумот и го има во кујнската сол и процесираните јадења како салами, сосови, конзервирани супи и чипсови, па затоа и најчесто не недостасува во секојдневната исхрана.

Но и овој минерал којшто е потребен за да се задржи балансот на течностите, притисокот на крвта и телесното pH ниво се губи во голема мера преку потењето. Сепак избегнувајте ги горенаведените производи и наместо тоа снабдете се со хлорид со помош на маслинки, морска трева, ‘рж, домати, зелка и целер.

Калиум

За лесно консумирање на калиум во секое време набавете си свежи или сушени овошја како што се портокалите, дињите, грозјето или сливите. За време на еден час напорен тренинг се губат 200 до 600 мг калиум, којшто ги поддржува функциите на клетките и срцето, спречува губење на коскената маса и камења во бубрегот и игра витална улога во работата на мускулите.

Изедете голема банана за да внесете 450 до 600 мг калиум. Други прехранбени производи коишто содржат калиум се печените компири, зелените зеленчуци како спанаќот, грашокот, гравот и авокадото.

Калциум

Млекото можеби не ви се чини како најдобар сојузник за време на натпревар, но научниците заклучиле дека пијалак богат со калциум делува подобро отколку вода или спортски напиток, кога треба да се рехидрира телото после напорни вежби.

Ова е затоа што млекото содржи микс од јагленихидрати, калциум, натриум и калиум, заедно со висококвалитетни протеини, коишто им помагаат на мускулите да заздрават.

Обидете се секој ден да внесувате храна со висока концентрација на калциум, како што е млекото (обично или од соја) во комбинација со житарки или јогурт.

Магнезиум

Заедно со калциумот, магнезиумот помага во работата на мускулите, функцијата на нервниот систем и активацијата на ензимите и развојот на коските. За да внесете доволна количина на магнезиум после вежбањето ви препорачуваме да јадете зелени листести зеленчуци, житарки, јаткасти плодови, путер од кикиритки и леќа, што е можно почесто.

Дополнително магнезиумот ќе ви помогне подобро да се справите со заморот. Кога во телото нема доволно минерали, тогаш тоа бара повеќе кислород и троши повеќе енергија при физички замор, па така без минерали се заморувате многу побрзо.

(О)Милена | Црнобело