Помага во слабеење, а го подобрува и здравјето: Што е антивоспалителна диета?

Антивоспалителната диета се фокусира на намирници кои ги намалуваат воспаленијата во телото. Притоа, лесно можете да ја приспособите на вашиот животен стил, не мора да трошите многу пари на скапи намирници, но и не мора да се откажете од омилената храна, туку само да бидете умерени.

Денес постојат безброј диети и не секогаш е лесно да одредите што е најдобро за вас ако сакате да се ослободите од вишокот килограми, но и да го подобрите здравјето.

Генерално, експертите советуваат да ги избегнувате брзите диети, кои ветуваат нагло слабеење за краток период бидејќи не се ефикасни долгорочно.

Истовремено, многу рестриктивните диети можат да доведат до недостаток од одредени хранливи материи, а со тоа и здравствен проблеми.

Изминативе неколку години, доста популарни се медитеранската и кето диетата, но нутриционистите сметаат дека можеби најдобра е таканаречената антивоспалителна диета, особено ако целта ви е да го подобрите здравјето.

„Антивоспалителната диета се фокусира на тоа да внесувате храна која се справува со воспаленијата во телото, а да избегнувате намирници кои можат да предизвикаат воспаленија“, вели нутриционистката д-р Нина Краули за Daily Mail.

Доброто кај оваа диета е што не мора целосно да се откажете од нездрави намирници, туку само да го ограничите нивниот внес.

Д-р Нина Краули вели дека овој начин на исхрана им се препорачува на луѓе кои имаат хронични заболувања, како дијабетес тип 2, дебелина и кардиоваскуларни болести.

Но, таа истакнува дека дури и да се сте здрава личност, можете да видите придобивки од овој начин на исхрана.

„За некои луѓе, целта не е да ги намалат воспаленијата во телото, но ако го направат тоа, ќе го подобрат здравјето на срцето, полесно ќе ја регулираат тежината, но и ќе ги намалат болката и вкочанетоста во зглобовите“.

Какви воспаленија спречува овој начин на исхрана?

Според Johns Hopkins Medicine, постојат два вида воспаленија – како одговор на повреда или зараза, но и воспаленија кои имаат влијание врз целото тело.

Вториот вид воспаленија можат да бидат предизвикани од хронични болести како:

• Дебелина
• Дијабетес тип 2
• Проблеми со срцето
• Некои видови рак
• Артритис
• Алцхајмер

Експертите сметаат дека овој вид воспаление може да се јави и кај здрави луѓе, ако внесуваат многу нездрава храна.

Односно, постојат одредени намирници кои можат да бидат причина за вакви воспаленија, па ако ги внесувате поретко, ќе го намалите ризикот.

Која храна предизвикува воспаленија во телото?

Постојат многу намирници на листата и главно ова е храна која е преработена.

Овде спаѓаат:

• Црвено месо, како плескавици
• Преработено месо, како сланина и колбаси
• Печива, торти и колачи
• Леб и тестенини од бело брашно
• Храна пржена со многу масло, како помфрит
• Храна со додадени шеќери
• Засладени пијалаци
• Храна со трансмасти, како маргарин

Која храна ги спречува воспаленијата?

Од друга страна, постојат намирници кои не само што не предизвикуваат воспаленија, туку можат и да ги намалат.

Овде спаѓаат:

• Храна со омега 3 масни киселини, како лосос и туна
• Храна со витамин Ц, како цитрусно овошје и пиперки
• Храна со полифеноли, како јаткасти плодови и маслиново масло
• Јаткасти плодови
• Овошје
• Зеленчук

Како да ја држите диетата?

Антивоспалителната диета не е класична диета со строго одредени оброци, туку повеќе е како начин на исхрана.

И, лесно е да ја следите – најголем дел од храната што ја внесувате во текот на денот нека биде антивоспалителна.

Во ред е повремено да си дозволувате и од намирниците кои предизвикуваат воспаленија, само важно е да бидете умерени.

Односно, ако денес изедете хамбургер за ручек, тогаш за вечера изедете салата и следниот ден избегнувајте многу преработена храна.

Предноста кај оваа диета е што е едноставна, не мора да трошите многу пари на посебни намирници и лесно можете да ја приспособите на вашиот начин на живот.

Притоа, не треба да се откажувате од омилената храна.

„За разлика од рестриктивните диети кои елиминираат цели групи храна, овој пристап се фокусира на јадење здрави и хранливи намирници кои природно се борат против воспаленијата.

Исто така, сметам дека храната не треба да се карактеризира како ’лоша‘ или ’добра‘, туку треба да се фокусираме на тоа да развиеме здрави навики кои го поддржуваат нашето здравје“, завршува нутриционистката.

Спирова С. | Црнобело